Yazıqlar olsun ki, vaqtınca Qırım işğali al-azırda 7 yıl devam etmekte, böyle şaraitlerde dünyanıñ bütün köşelerinde yaşağan aq qorçalayıcılarnıñ berabelikte yapılğan kündelik faaliyeti müim röl oynamaqtadır. 

«Al-azırdaki Qırım, işğalci akimiyet vekilleri tarafından insan aqları ve halqara gumanitar uquq muntazam şekilde bozulğan, iç bir türlü cinayet yapmağan insanlar bile aşırıcılıqta ya da terrorizmde qabaatlana bilgen ”kül rengindeki zonadır”» – dep izaatlay Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç.

«İnsan aqları kününde Ukrainağa qol tutqanlarını numayış etkenleri içün taqip etilgen vatandaşlarımıznıñ ğayretlerini ayrıca qayd etmege isteymiz. Aq qorçalayıcılar ve faaller aşırıcılıqta ve terrorizmde qabaatlanıp, siyasiy mabuslarğa çevirileler. Bügünde-bügün işğalci akimiyet tarafından yaqalanıp, 100 yaqın Ukraina vatandaşı siyasiy mabuslarğa çevirildi. Olarnıñ ekseriyeti – qırımtatarlardır. Server Mustafayev, Seyran Saliyev, Emir-Useyin Kuku, Volodımır Dudka, Oleksiy Bessarabov ve çoqtan-çoq diger vatandaşımız, iç bir türlü cinayet yapmağanlarına baqmadan, ale daa Rusiye apishanelerinde tutulalar. Olar yalıñız qanun bozuluvları aqqında bildirip, öz dostlarına ve tuvğanlarına qol tuta ediler».

Bugün Ukraina Prezidentiniñ Qırım MC-deki Temsilciligi adından, devlet akimiyeti organlarında ya da cemaat teşkilâtlarında, halqara müessiselerde ya da matbuat vastalarında çalışıp, Ukrainada insan aqlarını, vaqtınca işğal etilgen topraqlarda yaşağan vatandaşlarımıznıñ menfaatlarını milliy ve halqara seviyede qorçalamağa tırışqan er keske minnetdarlığımıznı bildirmege isteymiz. Adaletniñ tiklenmesi oğrunda küreşken er keske minnetdarmız.