Ukraina Prezidentiniñ Qırım MC-deki Temsilciligi tarafından Qırım Muhtar Cumhuriyeti ve Aqyar şeeri Prokuraturasına taqdim etilgen cedvelge medeniy ve atiqiy asabalıqqa dair yapılğan qanunsız areketlerge alâqaları olğan 54 uquqiy şahıs ve 63 fizikiy şahıs kirsetildi. Olarnıñ arasında devlet organlarınıñ, müzeylerniñ, qoruq-müzeylerniñ ve qanunsız şekilde yañıdan tamirlev işlerini yapqan teşkilâtlarnıñ reberiyeti bardır. Bundan ğayrı 2014-2020 seneleri devamında Qırım yarımadası topraqlarında atiqiy asabalıq obyektlerini keşif etüv ve ögrenüv maqsadınen qazuv işleriniñ yapılması içün RF Medeniyet Nazirliginden ruhset (açıq mektüpler) alğan 136 şahıs işbu cedvelge kirsetilgendir.
”Ukraina Prezidentiniñ Qırım MC-deki Temsilciligi medeniy asabalıqnı doğrudan-doğru qorçalav faaliyetine büyük diqqat ayıra, çünki Qıım yarımadasını medeniy ve tarihiy ceetten vaqtınca işğal ve silâlı istilâdan evel olğanı qadar zengin saqlanıp qalması bizim içün pek müim. Rusiye Federatsiyasınıñ siyaseti halqara uquq şartlarını boza, çünki işğalci vaqtınca işğal etilgen yarımadanıñ topraqlarında qazuvlar keçirip, medeniy asabalıqnıñ yañı obyektlerini keşif etüv ile yetinmey, aynı vaqıtta medeniy asabalıq obyektleri vaqtınca işğal etilgen Qırım yarımadasından Rusiye Federatsiyası topraqlarına alıp ketile. Böyleliknen Rusiye işğalcileri Qırım sakinlerini öz tarihine ve medeniyetine irişim imkâniyetinden marum ete. Temsilcilik taqımı cedvelge kirsetilgen fizikiy ve uquqiy şahıslarğa qarşı sanktsiyalar qabul etmek teklifinen mütenasip şahıslar cedvelini Ukraina Medeniyet ve haber siyaseti nazirligine, Vaqtınca işğal etilgen topraqlarnı ğayrıdan integratsiya etüv meseleleri boyunca Ukraina nazirligine ve Ukraina Havfsızlıq hızmetiniñ Qırım MC-deki Baş idaresine de yollay. Bundan ğayrı, işbu cedveller Ukraina Çetel işler nazirligine yuqarıda añılğan vaziyetke siyasiy-diplomatik yolnen tesir etmek ricasınen yollanıldı”, – dep izaatlay vaqtınca işğal etilgen Qırım Muhtar Cumhuriyeti ve Aqyar şeeri topraqlarında medeniy degerlikler ve atiqiy asabalıq saasında vaziyetke dair malümat kâğıdını Ukraina Prezidentiniñ Qırım MC-deki Daimiy Temsilcisiniñ Birinci muavini Darya Svırıdova.
Şahıslar cedveli ve tafsilâtlı malümat bu yerdedir: https://ppu.gov.ua/white_papers/