2020 senesiniñ arman ayında Ukraina Prezidentiniñ Qırım MC-deki Temsilciligi Viyana şeerinden Wolf D. Prix / Coop Himmelb(l)au Avstriyalı mimarcılıq bürosı sözde ”Aqyar devlet opera ve balet teatriniñ” qurulması içün leyha üzerinde çalışmağa devam etkenini, amma bu malümat matbuat vastalarınıñ saifelerinde derc etilgen soñ bunı inkâr etkenini Ukraina çetel işler Nazirligine haber etti. Avstriyalı şirketniñ Rusiye Federatsiyasınıñ siyasiy reberiyeti bergen sımarışlarnı yerine ketirip, işğal etilgen Aqyarda teatr qurucılığı ile oğrasqan Rusiye ”Milliy medeniy asabalıq” fondu, ”Gorka” leyhalar institutı, ”Stroytransgaz”, ”Metropolis” şirketleri ile resmiy şekilde añlaşmaları bar.
Bundan soñ Ukraina çetel işler Nazirligi Qırım Muhtar Cumhuriyeti ve Aqyar şeeri Prokuraturasına muracaat etti, neticede cinaiy dava açıldı.
Temsilcilik Qırımnı işğalden azat etmek ve vaqtınca işğal etilgen Qırımda insan aqlarınıñ bozuluvı adiselerine ve halqara uquq saasında başqa şartlarnıñ bozulmasına cevap bermek oğrunda idarelerarası işbirlikke yüksek qıymet kesmektedir.