Rusiye Federatsiyası vaqtınca işğal etilgen Qırım yarımadası topraqlarında Ukraina vatandaşlarını taqip etmege devam ete. Sözde ”Aqyar şeer mahkemesi” 66 yaşındaki Galina Dovgopolovanı Rusiye Federatsiyasına nisbeten devlet hainliginde qabaatlap, onı 12 yıllıq apis cezasına üküm etti. Bundan ğayırı, aynı şu saban ayınıñ 29-de sözde ”Aqyar şeeriniñ Gagarin rayon mahkemesi” ”Yehova şaatları” teşkilâtınıñ azası Viktor Staşevskiyni 6,5 yıllıq apis cezasına üküm etti.
Galina Pavlovna Dovgopolova Bahçisarayda doğdı, apisten evel Aqyar civarlarındaki Kaça qasabasında yaşay edi. Galina Dovgopolovanıñ taqip etilgeni aqqında 2020 senesi orta qış ayınıñ 8-de belli oldı. İşğalci memuriyetniñ fikirince, G. Dovgopolova Ukraina mudafaa Nazirliginiñ Baş istihbarat idaresi ile işbirlikte bulunıp, ”Qaradeñiz flotunıñ ayrı avacılıq polkı aqqında malümat” toplay edi.
Dovgopolova davası boyunca mahkeme ceryanı 4 oturışuvdan ibaret edi. Bu aqta bütün malümat ve şu cümleden imayecisiniñ adı gizlidir. Onı qabaatlı tanıp, umumiy tertipli koloniyada 12 yıl qalmasına ve azatlığınıñ 1 yıl devamında sıñırlanmasına üküm ettiler.
Qırımda qadınlar bundan evel de taqip etilip qorqutıla edi. Vaqtınca işğal devirinde uydurılğan qabaatlavlar ve manaçıqlarnen faal Larısa Kıtayska, Lütfiye Zudiyeva ve Mumine Saliyeva, abulqatlar Liliya Gemici ve Emine Avamileva, siyasiy mabuslarnıñ anaları ile ömür arqadaşları kibi onlarnen qadın-qızlar taqip etildi. Amma ilk kere 66 yaşındaki qadın casuslıqta qabaatlanıp, kerçekten de üküm etildi.
Qırım sakini Viktor Staşevskiyge çıqarılğan üküm: o, ”Yehova şaatları” diniy cemiyetiniñ faaliyetini teşkil etüvde qabaatlandı ve 6,5 yılğa üküm etildi. Bundan ğayrı oña yedi yıl devamında halq ögünde faaliyet alıp barmağa yasaq etildi.
Viktor Staşevskiy 2019 senesi ilk yaz ayınıñ 4-de Aqyar şeerinde ”Yehova şaatları” cemiyetiniñ azalarında keçirilgen tintüvlerden soñ yaqalandı. İşğalci quvetçilerniñ fikirince, 2017 senesi ”Yehova şaatları” Rusiyede aşırıcı teşkilât olaraq tanılğan soñ, yerli cemiyetniñ reisi vazifesindeki Viktor Staşevskiy ”faaliyetini devam etip, ”Yehova şaatlarınıñ” dünyabaqışlarını tarqata, toplaşuvlar keçire, diniy çıqışlarda buluna edi”.
Qırımda RF işğalci akimiyeti tarafıdan zorbalıqnen berilgen vatandaşlıq ve Qırımda yaşağan Ukraina vatandaşlarına zorbalıqnen berilgen pasportlar Ukraina tarafından tanılmağanını ve iç bir şeyge yaramağanını qayd etemiz. Aynı şekilde ”Yehova şaatları” Ukraina topraqlarında yasaq etilemez, işbu cemiyet azalarınıñ işğal etilgen Qırımda inanç serbestligi aqqlarına riayet etilmeli. Ukraina vatandaşları Galina Dovgopolova ve Viktor Staşevskiyge qarşı işğalci akimiyet tarafından çıqarlından qabaatlavlarğa siyasiy sebepten taqip etüv olaraq qıymet kesip, vatandaşlarımıznıñ azat etilmesini talap etemiz.
Ukraina Prezidentiniñ Qırım MC-deki Temislciligi Rusiye Federatsiyasına boysunmağan Ukraina vatandaşlarını taqip etken işğalci akimiyet organları ile Rusiye Federatsiyası akimiyetiniñ areketlerini takbih ete, aqip etüvnen bağlı er bir adiseni qayd etip, elde etilgen malümatnı ukrain uquq qorçalav organlarına ve halqara teşkilâtlarğa teslim ete. Vaqtınca işğal etilgen Qırımda vatandaşlarımıznı taqip etüvge alâqaları olğan şahıslar ertemi-keçmi mütenasip mesüliyetke çekilecektir.