Ukraina Prezidentiniñ Qırım MC-deki Temsilciliginiñ teşebbüsi ile Qırım Muhtar Cumhuriyeti Prokuraturası devlet imayesi altına alınğan topraqlarnı ve tabiat-qoruq fonduna ait obyektlerni, hususan Qırım tabiat qoruğını, Qırım tabiat qoruğınıñ ”Aqquşlar adası” ornitologik şubesini, ”Martyan burnu” milliy tabiat qoruğını, Opuq tabiat qoruğını aselet yoq etüvge ve olarğa zarar ketirüvge hızmet etken areketler yapqan Qırım işğalci akimiyetiniñ vekillerine qarşı Ukraina ceza Kodeksiniñ 252 maddesine binaen cinaiy iş açtı.
”Ekologiya meseleleri daima Ukraina Prezidentiniñ Qırım MC-deki Temsilciliginiñ nezareti altında buluna. Qırım tabiat qoruğı topraqlarında işğalci akimiyet qanunsız şekilde büyükligi 35 gektardan ziyade olğan ”Qırım” milliy parkını qurdı ve onıñ terkibinden ”Aqquşlar adası” ornitologik şubesini çıqardı. Qırım tabiat qoruğınıñ milliy parkka çevirilüvi onıñ faaliyetine menfiy tesir eter. Tabiat qoruğından farqlı olaraq, Qırımda qanunsız şekilde işletilgen Rusiye qanuniyetine binaen, milliy park topraqlarında hocalıq ve sağlamlaştıruv faaliyetlerini alıp barmaq mümkün, bu faaliyet ise daq qoruq ormanlarınа, olarnıñ ayvanlar ve ösümlikler çeşitligine menfiy tesir ete. Temsilcilik Qırım yarımadasında benzer bozuluvlarnı qayd etmege ve olarnı Qırım MC Prokuraturasına teslim etmege devam etecek, bundan ğayrı, Rusiye Federatsiyası ekologiya saasında yapqan cinayetler meselesini halqara meydançıqlarda ve BM Baş Assambleyasınıñ vaqtınca işğal etilgen Qırım MC ve Aqyar şeerinde er senelik qararlarında köterecektir”, – dep izaatlay Ukraina Prezidentiniñ Qırım MC-deki Daimiy Temsilciniñ Birinci muavini Darya Svırıdova.
Ukraina Prezidentiniñ Qırım MC-deki Temsilciligi Qırım sakinleriniñ ekologik aqlarını qorçalav meselesinde faallik köstergen Qırım Muhtar Cumhuriyeti Prokuraturasına, Igor Ponochovnyige ve Vitaliy Sekretarğa öz minnetdarlığını bildire. Qırım Muhtar Cumhuriyeti Prokuraturası bundan evel Keriç köprüsiniñ ve ”Tavrida” yolunıñ quruluvı, Qara deñizdeki Karkinit körfezinde qanunsız alda qum ve faydalı malzemelerniñ çıqarıluvı esnasında ekologik havfsızlıq şartları bozulğanı sebebinden cinaiy işler açqanını hatırlatamız.
Qırımnıñ ayvanat ve ösümlik alemlerine işğalciler tarafından ketirilgen zararlar aqqında tafsilâtlıca Ukraina Prezidentiniñ Qırım Muhtar Cumhuriyetindeki Temsilciliginiñ Baş mesleatçısı Vlad Miroşniçenkonıñ ”Tabiat hazinesi içün telüke yaratqan Damokl qılıçı” serlevalı maqalesinde oquñız:
https://ukurier.gov.ua/uk/articles/damokliv-mech-sho-zagrozhuye-prirodnim-skarbam/