”Arbiy-deñiz quvetleri Ukrainanıñ qorçalanma qabiliyetini temin etüvde daima müim röl oynay edi. 2014 senesiniñ saban ayında Qırım işğali başlanğanda arbiy deñizcilerniñ mertligini hatırlaymız. Ukrainalılar Donuzlav korfezinde “Çerkası” mina qıdırıcı gemisiniñ taqımı öz gemisini qorçalamağa tırışqanını ve soñunace manevralar yapqanını iç bir vaqıt unutmazlar. ”Çerkası” ile bir arada ”Kostântın Olşanskıy” gemisiniñ daireviy mudafaası da vatanperverlik ve cesürlikniñ nümünesidir. Antına hainlik yapmağan ve Ukrainanıñ topraq bütünligini bügünde-bügün suvdaki devlet sıñırlarında qorçalamağa devam etken er bir arbiyimizge minnetdarlığımıznı bildiremiz. Diplomatlar ve ordu ile beraberlikte Ukraina ADQ tolu manada Qırımğa qaytması üzerinde çalışamız”, – dep hitap etti arbiy deñizcilerge öz hayırlavında Ukraina Prezidentiniñ Qırım MC-deki Daimiy Temsilcisi Anton Korınevıç.

Hatırlatamız ki, Ukraina ADQ Künü ilk kere Aqyarda 1997 senesi oraq ayınıñ 1-de qayd etilgen edi. Şu künü Ukraina ADQ terkibine keçken sabıq Sovet Birligi ADQ Qaradeñiz flotunıñ gemileri üzerinde tantanalı sürette Ukraina arbiy-deñiz bayraqları köterildi. 2015 senesinden başlap, Ukraina ADQ Künü oraq ayınıñ birinci bazar kününde qayd etile.

2020 senesi oraq ayınıñ itibarınen 4 korvet, 2 mina qıdırıcı gemisi, 1 balaban desant gemisi ve 7 yardımcı gemi Rusiye işğalcileriniñ qollarında qalmaqtalar. 2014 senesi Qırımda 2 dane qurulıp bitmegen (95% ve 60% azır olğan) korvet de zapt etilgen edi.

2020 senesi ilk yaz ayında çıqarılğan fotoresimde üzerinde ukrain ve qırımtatar bayraqları köterilgen Ukraina ADQ (Şimaliy Qırımdaki bir şeerniñ adını taşığan) ”Yañı qapu” reyd buksiri.