”Qırımnı işğalden azat etüv tışqı ve içki taraflardan ibarettir.
Tışqı tarafı – halqara teşkilâtlar, halqara mahkemeler, endiden başlap ise, teşkiliy kometeti al-azırda tasdıqlanğan ”Qırım platformasıdır”. İçqı tarafında ise al-azırda Ukraina Prezidentiniñ Fermanı ile tasdıqlanğan ve mütenasip devlet organlarınıñ Qırım boyunca faaliyetleri içün temel olaraq hızmet etken Qırım Muhtar Cumhuriyetini ve Aqyar şeerini işğalden azat etüv ve ğayrıdan integratsiya etüv Strategiyası, işbu Strategiya pek çoq mevzularnı aydınlata: haber siyaseti, insan aqlarını qorçalav, iqtisadiy, ekologik, medeniy, tehnikiy meseleler ve içtimaiy-iqtisadiy aqlar.
Qırımnı işğalden azat etüv aqqında bundan evel aytsaq da, o vaqıt siyasiy qararlarımız yoq edi. Bu, ”Qırım platformasınıñ” arfesinde pek müim qarardır. Çünki halqara ortaqlarımızdan qol tutuv sorar ekenmiz, özümiz de bir şeyler yapqanımıznı köstermelimiz.
Eñ esası, Qırımnı işğalden azat etüv ve ğayrıdan integratsiya etüv Strategiyasında tamır halqlar aqqında yazılğanını istegen edik, tamır halqlar aqqında Ferman ale daa qabul etilmedi, amma Strategiyada tamır halqlar endi añıla. Strategiya keniş çerçivedir. Şubesiz ki, içine bütün izaatlar, tenbiler ve tüzetüvler kirip olamadı. Endi ise strategiyanıñ amelge keçirilüvine dair açıq-aydın areket planınıñ, tedbirler planınıñ vucutqa ketirilmesi pek müim, ve işbu tedbirler planı muayyen qanun leyhalarından ibaret olmalıdır”.
Anton Korınevıç Qırımdaki suv qıtlığı vaziyetini izaatladı: ”Qırım işğalden azat etilmegence, suv ile temin etilmeycek. Bu, al-azırda vaqtınca işğal etilgen topraqlar meselesinen oğraşqan bütün Ukraina devlet organlarınıñ bir ağızdan bildirilgen mevamıdır. Halqara uquq ceetinden de bu noqtayi-nazar açıq-aydındır. İşğalci devletni anda kimse çağırmadı. İşbu torpaqlarnı vaqtınca işğal eter eken, anda olıp keçken bütün vaqialar içün mesüliyet çekmeli, şu cümleden vaqtınca işğal etilgen topraqlarda yaşağan grajdan ealiniñ ihtiyaclarını temin etmelidir.
Facia meselesine kegende ise, aslında Qırım Rusiye Federatsiyası tarafından vaqtınca işğal etilgeni içün, faciağa oğradı. Rusiye Federatsiyası Qırımğa qanunsız şekilde deerlik yarım millionğa yaqın vatandaşını köçürdi, bu, arbiy cinayettir. Rusiye Federatsiyası Qırımnı arbiylerinen, sözde uquq qorçalayıcılarnen toldurdı. O, Qırımnıñ sıfatını deñiştire, anda yañı binalar, çoqqatlı evler qura. Şubesiz ki, suv baylığı işğalci devletniñ arbiylerine ve Qırımda kerçekleşken yañı leyhalarına da masraf etilecektir”.