Körüşüvde Temsilciniñ muavinleri Darya Svırıdova ile Tamila Taşeva ve Ukrainada Litva Cumhuriyeti Elçisiniñ mesleatçıları Tomas Sikorskis ile Tadas Valnonis iştirak ettiler.
Körüşüv esnasında insan aqlarınıñ bozuluvı meselesinen bir arada Qırımnı ve Qaradeñiz regionını silâlaştiruv, yarımadağa Rusiyeden avuştırılğan adamlar esabına yerli ealini almaştıruv, bala aqlarını bozuv, Rusiye Federatsiyası tarafından teşkil etilgen arbiy teşkilâtlarğa balalarnı celp etüv, Rusiye ordusına qanunsız şekilde gençlerni çağıruv, tabiatqa ketirilgen zarar, Ukraina Ortodoks Kilisesine basqı, tamır qırımtatar halqınıñ aq-uquqlarını bozuv kibi meseleler muzakere etildi. Körüşüvde muzakere etilgen müim meselelerden biri, sanktsiyalar tertibi meselesi, Ukraina ortaqları tarafından sanktsiyalar cedvelini kenişletüv ve 2014 senesi saban (mart) ayında BM Baş Assambleyasınıñ qararında qayd etilgen tanımamazlıq siyasetini devam etüvdir. İşğalci «organlar» tarafından areket sıñırlanması ile bağlı olğan yañı çağıruvlar da ayrıca muzakere etildi.
Litva Cumhuriyeti, Ukrainanıñ Rusiye tecavüzine qarşı küreşinde memleketimizniñ daimiy ortağı, çünki topraqlarını işğalden azat etüvge dair öz tecribesine saiptir. Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Litva Cumhuriyetiniñ Ukrainada Fevqulâde ve Tolu Vekâletli Elçisi Valdemars Sarapinasqa Qırım meselesine diqqat etkeni içün öz minnetdarlığını bildirdi.
