”Qırım Rusiye Federatsiyası tarafından işğal etilmesinen, Qırımnıñ matbuat saasında esasen qırımtatarlarğa, etnik ukrainalılarğa, Qırımtatar Milliy Meclis azalarına ve jurnalistlerge nisbeten nefret tili artqan edi. Tamır Qırım halqınıñ temsilcileri, qırımtatarlar, ekseriy allarda radikal islamcılar ve aşırıcılar, olarnı temsil etken organ, yani Qırımtatar Milliy Meclisi aşırıcı teşkilât olaraq tasvir etilmekteler. Musulmanlar suniy şekilde teroristlernen teñeştirile, Yegova şaatları da aşırıcı teşkilât olaraq tanıla, Ukraina Ortodoks kilisesiniñ Qırım yeparhiyası ise işğalci akimiyet tarafından devamlı makeme vastasınen ve memuriy basqığa oğratıla.
Ekseriy allarda nefret tili işğal etilgen Qırımda da numayış etilgen merkeziy Rusiye kanallarınıñ haberlerinde ve haber-talil leyhalarında, em de Rusiye işğalci akimiyeti devlet organlarınıñ resmiy Internet saifelerinde ve yerlı Qırım matbuat vastalarınıñ İnternetteki saifelerinde qullanıla”, – dep izaatladı Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç.
Neticede çıqışınıñ soñunda Daimiy Temsilci bir qaç tevsiye berdi: ”Vaqtınca işğal etilgen Qırımnıñ matbuat saasındaki vaziyet beterleşmege devam ete ve daimiy şekilde nezaret etlimeli, bu cümleden:
- işğal etilgen Qırımda Rusiye işğaliniñ hususan nefret tili saasında aqibeti aqqında cemaatnı haberdar etmek;
- Rusiye Federatsiyasını vaqtınca işğal etilgen Qırımda halqara gumanitar uquqqa, insan aqları saasında halqara uquqqa riayet etmege, nefret tilinde tasvir etilgen zorbalıq, qorqutuv ve aqaretlev areketlerinden tınç ealini qorçalamağa çaqırmaq;
- Qırımda yaşağan tınç ealiniñ ırq ceetten, diniy ve siyasiy baqışları sebebinden diskriminatsiya etilmesine yol bermemek;
- Ukrainanıñ vaqtınca işğal etilgen Qırımında ve Aqyar şeerinde insan aqları saasında vaziyetni nezaret etmek maqsadınen regional ve haqara nezaret etici vastalarnıñ yarımadağa irişimlerine qol tutmaq kerekmiz”.