Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıçnıñ iş aftası muavinleri Darya Svırıdova ve Tamila Taşeva ile beraber Ukrainada Gürçistan Elçiligi meseleleri boyunca mesüliyetli Davıd Boçorişvili ile körüşüvinden başlandı.

Körüşüv esnasında insan aqlarınıñ bozuluvı meselesinen bir arada Qırımnı ve Qaradeñiz regionını silâlaştiruv, yarımadağa Rusiyeden avuştırılğan adamlar esabına yerli ealini almaştıruv, bala aqlarını bozuv, Rusiye Federatsiyası tarafından teşkil etilgen arbiy teşkilâtlarğa balalarnı celp etüv, Rusiye ordusına qanunsız şekilde gençlerni çağıruv, tabiatqa ketirilgen zarar, Ukraina Ortodoks Kilisesine basqı, tamır qırımtatar halqınıñ aq-uquqlarını bozuv kibi meseleler muzakere etildi.  Körüşüvde muzakere etilgen müim meselelerden biri, sanktsiyalar tertibi meselesi, Ukraina ortaqları tarafından sanktsiyalar cedvelini kenişletüv ve 2014 senesi saban (mart) ayında BM Baş Assambleyasınıñ qararında qayd etilgen tanımamazlıq siyasetini devam etüvdir. Ayrıca işğalci organlar tarafından areket sıñırlanması ile bağlı olğan yañı çağıruvlar da ayrıca muzakere etildi.

Gürcistan Ukrainanıñ Rusiye tecavüzine qarşı küreşinde memleketimizniñ daimiy ortağı, çünki topraqlarını işğalden azat etüvge, memleket içinde avuşuvğa dair öz tecribesine saiptir. Başqa memleketlernen tecribe ile almaşuv, vaqtınca işğal etilgen topraqlarnen bağ tutuv silâlı tecavüzniñ menfiy neticelerine qarşılıq kösterüv saasında devlet siyasetiniñ müim qısımlarıdır. Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Ukrainada Gürçistan Elçiligi meseleleri boyunca mesüliyetli Davıd Boçorişvilige Qırım mevzusınen meraqlanğanı içün öz minnetdarlığını bildirdi.