Oktyabr 24 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin Regional inkişafı şurasınıñ keñeşinde iştirak etti. Ukraina Prezidenti alıp barğan toplaşuv devamında merkeziy idare etüvden yerli idare etüvge keçme meselesi ve islâatlarnıñ devamlı areketke keçirilmesi muzakere etildi. Teneffüs devamında ise Boris Babin merkeziy, vilâyet ve yerli akimiyetniñ vekilleri ile Temsilcilikniñ ögünde turğan meselelerniñ al etilmesine bağışlanğan körüşüvler keçirdi.

Bundan da ğayrı, Daimiy Temsilci Büyük Britaniyanıñ Ukrainadaki elçiliginiñ vekilleri Lisa Tamvud ve Svitlana Yavorska, AQŞnıñ Ukrainadaki elçiliginiñ vekili Rebekka Farmer, AQŞ halqara inkişaf (USAID) agentliginiñ vekili Deniel Rayan ve İRİ Halqara cumhuriyet institutınıñ hadimi Maykl Drakman ile körüşti. Körüşüvler devamında vaqtınca işğal olunğan topraqlarınıñ sıñırında yerleşken kiriş-çıqış nezaret noqtalarına tehnikiy yardım kösterme, Qırım sakinlerine memuriy ve tasil hızmetlerini berme, analitik işleriniñ keyfiyetini arttırma kibi meselelerde işbirlikniñ birinci nevbetteki şekilleri, yolları, ceryanları ve usulları muzakere etildi.

Bundan da ğayrı, Rusiyeniñ Ukrainağa qarşı istilâsınıñ işğal olunğan topraqlardan ilerilemesiniñ öğünü alınması, Qırımda insan aq-uquqlarınıñ ve halqara qanunlarnıñ ciddiy bozuluvlarınıñ beyan etilmesi ve cezalav şekilleri, em de ecnebiy devletlerniñ işğalci memleketke qarşı kirsetilgen sanktsiyalarğa riayet etmeleri Büyük Britaniya ve AQŞnıñ vekilleri ile muzakere etildi.