Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavinleri Darya Svırıdova ile Tamila Taşeva Ukraina çetel işler Naziriniñ Birinci muavini Emine Caparova ile körüştiler.

İş muşaveresi çerçivesinde Temsilcilikniñ esas yönelişleri qayd etildi ve Ukraina çetel işler Nazirligi ile halq ögünde diplomatiya ve halqara meydançıqlarda faaliyet kibi yönelişlerde yapıla bilecek umumiy areketler muzakere etildi.
Böyle faaliyet yalıñız halqara ortaqlarımıznı Ukrainada ağımdaki vaziyet aqqında haberdar etüvden ya da vaqtınca işğal etilgen topraqlarda insan aqları saasındaki ayrı bozuluvlarğa qıymet kesüvden ibaret degildir. Aynı vaqıtta, Rusiye Federatsiyasına nisbeten sanktsiyalarnı devam etüv ve kenişletüv, Rusiye torpaqlarında ve işğal etilgen Qırımda qanunsız şekilde azatlıqtan marum etilgen Ukraina vatandaşları – siyasiy mabuslarnıñ aq-uquqlarınıñ qorçalavıdır.

Körüşüv esnasında Qırımnı işğalden azat etüv oğrunda daimiy faaliyet köstergen halqara meydançıqnı teşkil etüv ile müessiseler arasında malümatnen almaşuv, Qırım mevzusını umumukrain siyasiy, medeniy ve haber saalarına qaytaruv kibi ameliy meselelerge ayırca diqqat etildi.

Taraflar Ukraina çetel işler Nazirligi platforması çerçivesinde Rusiyede bulunğan siyasiy mabuslarnı azat etüv oğrunda halqara ğayretlerni yönetüv saasında işbirlik aqqında añlaştılar. Bundan ğayrı, Ukraina vatandaşlarınıñ aq-uquqlarını ve qanuniy menfaatlarını halqara seviyede qorçalav oğrunda halqara mevamımıznı quvetleştirmek ve Ukraina tarafından yapılğan adımlar aqqında vaqtınca işğal etilgen Qırımda yaşağan vatandaşlarnı haberdar etmek maqsadınen ekspertler müiti celp etilecektir.

Ukraina Prezidentiniñ Qırım MC-deki Temsilciligi içün Ukraina çetel işler Nazirligi ile işbirlik Qırım yarımadasını Ukraina bayrağı altına qaytaruv oğrundaki küreşte eñ müim yönelişlerinden biridir.