Rusiye Federatsiyasınıñ Qırımdaki işğalci akimiyetinen ya da oña boysunğan müessise ve teşkilâtlarınen çetel devlet vatandaşlarınıñ açıq ya da gizli munasebetlerine dair Temsilcilik tarafından ağımdaki yılnıñ başından berli toplanğan malümatlarnen faydalanıp, İndistan, İsrail, İrlandiya ve Norvegiya devletlerinde çalışqan Ukraina Elçihaneleri bulunğan memleketlerinde haber-bildirüv faaliyet alıp bardı, neticede işbu devletlerniñ resmiy akimiyetleri deñişmegen şekilde Qırım Muhtar Cumhuriyetiniñ ve Aqyar şeeriniñ Rusiye Federatsiyası tarafından işğal etilmesini tanımağanı, Rusiye Federatsiyasınıñ Qırımdaki işğalci akimiyetnen ya da oña boysunğan müessise ve teşkilâtlarınen iç bir türlü munasebetleri olmağanı, böyle munasebetlerniñ kesen-kes imkânsız olğanı tasdıqlandı.
Temsilcilik Ukraina tış işler Nazirligine ve elçihanelerimizge semereli işbirlikte bulunğanları ve Qırım Muhtar Cumhuriyetini ve Aqyar şeerini işğalden azat etüv ile ğayrıdan integratsiya etüv, devletimizniñ topraq bütünligini ğayrıdan tiklev oğrunda halqara ğayretlerini birleştirmek maqsadınen çetelde daimiy şekilde siyasiy-diplomatik faaliyetni alıp barğanları içün öz minnetdarlığını bildire.