2021 senesi saban ayınıñ 9-da Vladıslav Yesıpenko Aqmescit şeerinde Taras Şevçenkonıñ doğğan künü munasebetinen keçirilgen tedbirde iştirak etti, bundan soñ o, saban ayınıñ 10-da yaqalandı ve saban ayınıñ 12-de Qırımda Rusiye Federatsiyasınıñ işğalci akimiyet organlarına boysunğan sözde ”Kıyiv rayon mahkemesi” V. Yesıpenkonıñ 2 ayğa, yani qural aynıñ 11-ne qadar apiske alınuvı aqqında qarar çıqardı. Yaqalanğan vatandaş qanunsız şekilde ateşli silâni, onıñ esas qısımlarını istisal etüv, yañıdan yapuv ya da tamir etüvde ve patronlarını istisal etüvde qabaatlandı.

Al-azırda Ukraina vatandaşı Vladıslav Yesıpenko qorçalav aqqından marum etildi, çünki mustaqil abulqatlar onınen körüşip olamay. Oña qarşı qanunsız taqiqat etüv vastaları işletile.

Saban ayınıñ 16-da Rusiye Federal Havfsızlıq Hızmeti Vladıslav Yesıpenkonıñ ”Ukraina mahsus hızmetleriniñ menfaatlarına çalışıp, taqiqat-zarar ketirici faaliyetnen oğraşqanını”, yanı ”Qırımda insanlarnıñ kütleviy şekilde bulunğan yerlerniñ, yaşayışnı temin etüv yerlerniñ fotoresimler ile videosını çıqarğanını” ilân etti.

Vladıslav Yesıpenkonıñ taqip etilüviniñ esas sebebi ise, onıñ ”Azatlıq Radiosı”, ”Qırım.Aqiqat” leyhaları içün serbest şekilde çalışqan hadim olaraq yürsetken jurnalistik faaliyetidir.

Rusiye Federatsiyası sovet deviri siyasetni devam ete, fikir serbestligini sıñırlap, jurnalistlerni, blogerlerni ve içtimaiy ağlarnıñ aqiy qullanıcılarnı taqip etip, dünyada vaqtınca işğal etilgen Qırım Muhtar Cumhuriyeti ve Aqyar şeeri topraqları aqqındaki haberlerniñ tek Rusiye propagandasından ibaret olğanını istey. Rusiye tasavur etken dünyada insan aqları, tamır qırımtatar halqınıñ aqları, ukrain tili ve medeniyeti, mustaqil jurnalistika kibi qıymetler içün yer yoq.

Ukraina Prezidentiniñ Qırım Muhtar Cumhuriyetindeki Temsilciligi yarımada topraqlarında Ukraina vatandaşlarını taqip etüvnen bağlı er bir adiseni qayd ete ve elde etilgen malümatlarnı ukrain uquq qorçalav organlarına teslim etip, halqara ortaqlarınen muzakere ete. Vaqtınca işğal etilgen topraqlarda jurnalistik faaliyetinen oğraşqanı içün Vladıslav Yesıpenkonıñ taqp etilüvi halqara uquqnıñ qaba şekilde bozuluvıdır. Temsilcilik vaqtınca işğal etilgen Qırım Muhtar Cumhuriyeti ve Aqyar şeeri topraqlarında yaşağan Ukraina vatandaşlarınıñ aq-uquqlarını ve qanuniy menfaatlarını qorçalanması oğrunda çalışa ve çalışmağa devam etecektir.