Hatırlatamız ki, arman ayınıñ 8-de sözde ”Ekstremizmge qarşılıq kösterüv merkeziniñ hadimleri” Qarasuvbazar rayonınıñ Arğın köyündeki UOK Qırım patrikhanesi azreti Dımıtriy Solunskıy adına manastırınıñ binasına kirip, başrahipni saba ibadetini toqtatmağa mecbur ettiler. İşğalci akimiyetniñ vekilleri qanunsız areketlerini ibadet Rusiye qanuniyetine riayet etmegeninen aqlamağa tırıştılar.

Qırım Muhtar Cumhuriyeti ve Aqyar şeeri Prokuraturası 2021 senesi arman ayınıñ 9-da vaqtınca işğal etilgen yarımada topraqlarında kerçekleşken diniy ibadetke qanunsız şekilde keder etüv adisesi sebebinden (Ukraina Ceza Kodeksi 180 maddesiniñ 1-inci qısmı boyunca) kriminal dava açtı. 

Mahkemeden evelki taqiqatnı Milliy Polisniñ Qırım MC ve Aqyar şeerinde Baş idaresi alıp baracaq. Tafsilâtlı malümat bu yerdedir: https://bit.ly/3jInRDm. 

İşğalci akimiyetniñ bu kibi areketleri halqara gumantar uquqnıñ şartlarını bozmaqta ve Qırımda ukrain diniy cemiyeti ayrımcılıqqa oğrağanını ve sıqıştırılğanını nevbetteki kere isbatlamaqtadır. 

Rusiye Federatsıyasını vaqtınca işğal etilgen Qırım Muhtar Cumhuriyeti ve Aqyar şeeri topraqlarında Ukraina vatandaşlarına nisbeten diniy mensübiyetleri boyunca qanunsız taqip etüvni toqtatmağa, diniy serbestlikke riayet etmege çağıramız.