Bugün Qırım MC Aqmescit rayonınıñ Mamaq köyünde yerli imam Rayif Fevziyev, Aqyar şeerindeki Balaqlava rayonınıñ Eski Şüli köyünde qırımtatarı Cabbar Bekirov, Qırım MC Bağçasaray rayonınıñ Zalanköy köyünde Zaur Abdullayev ve Aqyar şeerindeki Nahimov rayonınıñ Povorotne köyünde Rustev Murasov ve Rustem Tayirovnıñ evlerinde keçirilgen qanunsız tintüvler ve yaqalamalar qırımtatar halqını ve onı temsil etken organlarını Qırımdan quvuvdan, aqlarını qorçalvda er türlü birdemlik ve faallik izarlarını boğuvdan ve diniy baqışlar içün taqip etüvden başqa bir şey degildir. Yaqalanğanlarnıñ ekseriyeti faal grajdanlıq mevamını numayış etip, muntazam sürette siyaset esaslı mahkeme ceryanlarını ziyaret ete, siyasiy mabuslarnıñ qorantalarına qol tuta, köylerinde diniy tedbirlerni teşkil ete edi.
Vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Federatsiyası tarafından taqip etüv ve arbiy cinayetlerni işlev bu qararlarnı bergen siyasiy reberiyetini mıtlaqa yañı ”Nürnberg ceryanına” ketirecektir.
Ukraina devlet organları eñ ağır cinayetler içün cezanıñ qaçınmamazlığı ilkesine esaslanıp, er bir cinaiy adiseni qayd etmekteler. Al-azırda Qırım Muhtar Cumhuriyeti ve Aqyar şeeri Prokuraturası Ukraina Ceza Kodeksi 162-nci maddesiniñ 2-nci qısmı (ev-mesken toqunmamazlığını bozuv) ve Ukraina Ceza Kodeksi 146 maddesiniñ 2-nci qısmı (qanunsız şekilde azatlıqtan marum etüv) bounca dava açtı. Bütün qabaatlı şahıslar belgilenip mesüliyetke çekilir.
Rusiye Federatsiyasını bir kere daa vaqtınca işğal etilgen Qırımda Ukraina vatandaşlarınıñ muntazam şekilde milliy ve diniy alâmetleri boyunca, baqışları, mevamları ve fikirleri içün taqip etilmesini ve cezalanmasını toqtatmağa çağıramız. Rusiye Federatsiyası ”Ukraina Rusiye Federatsiyasına qarşı” davasında 2017 senesi vaqtınca tedbirlerni amelge keçirip, şu cümleden qırımtatarlarnıñ menfaatlarını temsil etken organlarnı sıñırlamamaq, Meclisniñ faaliyetini ğayrıdan tiklemek qarar etken BM Halqara mahkemesiniñ qararını yerine ketirmeli.
Yaqalanğanlarnıñ aqrabalarına qol tutuvımıznı bildiremiz. Ukraina vaqtınca işğal etilgen Qırımnı işğalden azat etilmesi, bu ve başqa cinayetlerde qabaatlı olğan şahıslarnıñ mesüliyetke çekilmesi içün qolundan kelgenini yapacaqtır.