Bugün Rostov-na-Donu şeerindeki Cenübiy arbiy mahkemesi tarafından «Aluştadaki Hizb ut-Tahrir gruppası» davası boyunca çıqarılğan üküm, tamır qırımtatar halqını ve onı temsil etken organlarını Qırımdan quvuvdan, işğalci akimiyet tarafından er türlü itaatsızlıq izarlarını boğuvdan ve diniy baqışlar içün nevbetteki maküm etüvden başqa bir şey degildir.
4 Qırım sakini, yani Ruslan Mesutov, Ruslan Nagayev, Eldar Kantimirov ve Lenur Halilov terorizmde qabaatlanıp, 18, 13, 12 ve 18 yıl devamında qattı tertipli koloniyada qalmalarına üküm ettildi.
Hatırlatamız ki, dörtü de 2019 senesi ilk yaz ayınıñ 10-da Qırımda evlerinde keçirilgen tintüvlerden soñ Rusiyede 2003 senesinden berli yasaq etilgen islâm siyasiy fırqanıñ azaları olğanında qabaatlanıp yağalandı. Ukraina topraqlarında ve dünyadaki devletlerniñ ekseriyetinde bu teşkilât milliy qanuniyet seviyesinde sıñırlanmayıp faaliyetini yürsete.
2019 senesi oraq ayınıñ 18-de Avropa parlamenti qararnamesini qabul etip, Rusiyeni ukrain siyasiy mabuslarnıñ cemisini ve şu cümleden bu kriminal davanıñ iştirakçilerini azat etmege çağırdı.
Rusiye Federatsiyasını bir kere daa vaqtınca işğal etilgen Qırımda Ukraina vatandaşlarınıñ milliy ve diniy alâmetleri boyunca taqip etilmesini toqtatmağa ve apis etilgen bütün şahıslarnı deral azat etmege çağıramız.
Foto: Qırım birdemligi