Aziz vatandaşlar!

Bir qaç saniyeden eki biñ on sekizinci yılnıñ yılnamesi Ukraina tarihinde qalacaqtır. Onıñ anda ayrı bir yeri bar. O, devlet mustaqilligimiz ilân etilgen bir biñ doquz yüz doqsan birinci yılnıñ yanındadır. İlk qış (dekabr) 15 künü mında, Aziz Sofiya kilisesinde, Birleştirici toplaşuv olıp keçti. Meydanda toplanğan biñlerce insanlar közyaşlarından utanmay ediler. Bu, quvanç közyaşları edi. Niayet, dünya ortodoksları tarafından tanılğan Ukraina Ortodoks Kilisesi doğdı. Kilisemizniñ mustaqilligi içün asırlar devamında alınıp barılğan küreş niayet ğalebe ile yekünlendi. Bu – kerçek mücizedir! Bu, bizde, ukrainalılarda, endi er şey kerçekten yahşı olacağını temsil etip, Tañrıdan kelgen bir alâmettir. Yaqınlarda, İsa Peyğamberimizniñ doğğan kününde Ukraina çoqtan berli beklegen Tomosnı, yani Fener Patrikhanesinden yarlıqnı alacaqtır. Bu bizim maneviy mustaqilligimizni resmiy şekilde pekitir.

Moskovadan uzaqlaşıp, Avropağa yaqınlaştıq. Bu, soñki beş yıl devamında sapmayıp ketken yolumızdır. Biz öz yolumıznen ketemiz. Bizni ne de berilgen tatlı vadeler, ne de ümütsizlik urluqları, ne de añlaşmamazlıq zeeri keri çevirmesin.

”Halqnıñ küçü birliktedir, Tañrı bizge birlik ber”, – bu sözler kelecek sene em akimiyet, em cemiyet, em de er ayrı vatandaş içün bir şiar olsun. Eki biñ on doquz senesi – bu Birleşüv areketiniñ yüz yıllığı, serbest birleşüvimizniñ yüz yıllığıdır. Er şeyden ziyade barışıqnı isteymiz. Ve bizden ziyade barışıqnı istegenler yoq. Onıñ içün siziñ adıñızdan ukrain arbiylerni hayırlamağa isteyim. Yılbaş gecesi olar bizler içün tınçlıqnı ve barışıqnı kefil eteler.

Bizim minnetdarlığımıznı ve yüreklerimizniñ sıcağını rusiye esirliginde bulunğan ukrain deñizcileri de is etsinler. Olarnıñ arasında yaralanğan Andriy Eyder, Vasıl Soroka, Andriy Artemenko barlar. Ve rusiye apishanelerindeki ukrain siyasiy mabuslar. Ve işğal etilgen topraqlarda reineler olaraq qalğan vatandaşlarımız.

Qırımda ve Donbasnıñ öbür tarafında yaşağan millionlarnen vatandaşlarımızğa muracaat etem. Yolumız ne qadar uzun olsa da, sizge mıtlaqa sulh ile qaytarmız. Qorantamız mıtlaqa bir masa başında birleşip, Yañı yılnı Kıyiv vaqıtı boyunca qarşılaycaqtır.

Aziz ukrainalılar!

Eñ ağırı endi keçti, eñ beteri de artta qaldı. Ögde bizni iqtisadımıznıñ artuvı ile yaşayış seviyemizniñ eyileşüvi bekley. Bu umumiy zametli faaliyetimizniñ neticesidir.

Eñ esası – saylav aldındaki qalabalıqta büyük qurbanlarnıñ ve er biriñizniñ qocaman ğayretleri esabına östürilgen inkişaf filizlerni taptamamaqtır. O zaman biz mıtlaqa ğalebe qazanırmız.

Er keske hayırı Yañı yıl tileyim!

Qadirimizni utandırmayıq!

Ukrainağa şan-şüretler olsun!

https://www.president.gov.ua/news/novorichne-privitannya-prezidenta-ukrayini-52350