Ukraina Qırımnı qaytaruv vastaları üzerinde çalışmaqta. Bu aqta Prezident Volodımır Zelenskiy Kıyiv şeerinde keçirilgen 16-ncı er senelik Yalta Avropa strategiyası körüşüvindeki panel munaqaşada iştirak etken arada bildirdi.

”Kerçekni aytam – biz tüşünemiz, bir qaç formatımız, bir qaç fikirimiz bar”, – Qırımnı Rusiye işğalinden azat etüv strategiyası boyunca sualge cevap berir eken, dep qayd etti Devlet başlığı.

Volodımır Zelenskiy tafsilâtlı sübetniñ vaqıtı daa kelmegenini, bütün inceliklerini al-azırda bildirmege istemegenini qayd etti. ”Bunı sizge şimdi aytalmayım – daa pek erte. (Apiste bulunğanlarnıñ – muarririyetten) azat etilüvi kibi olacaq, ğaylerimizni başqa adamlar tarafından qullanılmasını istemeyim”, – dep ayttı o.

Devletniñ başlığı Qırımnı qaytaruv eñ qıyın mesele olacağını tahmin etti.

Aynı vaqıtta Ukraina Prezidenti al-azırda Normand formatında körüşüvler keçirmegenini ve Rusiye Federatsiyası Prezidenti ile körüşmegenini qayd etti.

Bundan ğayrı o, Amerika Qoşma Ştatları Prezidenti Donald Tramp ile körüşmege niyetlengenini bildirdi. ”Sizge aytqanım kibi, muim körüşüvlerim bar, bu cümleden, AQŞ Prezidenti ile körüşüv. Şekili üzerinde tüşünemiz. Qırımnı qaytarmaq içün küreşemiz. Ve tek sözde degil”, – dep yekünledi Devlet başlığı.

Menba: https://www.president.gov.ua/news/ukrayina-pracyuye-nad-formuloyu-povernennya-krimu-volodimir-57241