2017 senesi dekabr 8 künü Ukraina ve Avropa Birligi Brüsselde Assotsiyatsiya Şurasınıñ dörtünci toplaşuvını keçirdiler. Bu ise, Ukraina ve Avropa Birligi arasında assotsiatsiya aqqında Añlaşmanıñ, bu cümleden serbest ticaret zonasınıñ, 2017 senesi sentyabr 1 künü çalışmağa başlağanından ve Ukraina vatandaşlarına 2017 senesi iyün 11 kününden başlap AB memleketlerine vizasız seyahat imkânınıñ berilmesinden berli birinci toplaşuvları oldı.

AB assotsiatsiya Şurasınıñ toplaşuvı neticesinde, Ukraina baş naziri ve AB tış işleri ve havfsızlıq siyaseti boyunca Yüksek temsilcisi beraberlikte yapqan beyanatlarında Rusiye tarafından Qırım Muhtar Cumhuriyeti ve Aqyar şeeriniñ qanunsız şekilde işğal olunğanı tekrar qayd etilidi. Ukraina tarafından Ukrainalı Qırımnıñ dostları halqara gruppasınıñ teşkil etilmesi teklif etilidi. Assotsiatsiya Şurası, Qırım yarımadasınıñ devam etken Rusiye tarafından silâlaştırılmasını ve insan aq-uquqları saasında vaziyetniñ kerginleşmesini, bu cümleden Qırımtatar Milliy Meclisniñ yasaq etilüvini ve qanunsız anneksiyanı qabul etmegenlerini cezalavğa oğratılmasını teñkid etti. Assotsiatsiya Şurası Rusiyede ve işğal olunğan Qırımda qanunsız şekilde apis etilgen Ukraina vatandaşlarını deral azat etmege çağırdı.