Ukraina Yuqarı Şurasında Ukraina Prezidenti Volodımır Zelenskıynıñ teşebbüsi ile ”Aliy tasil aqqıda Ukraina qanunına deñişmeler kirsetüv aqqında” acele qanun leyhası qayd etildi. Bu qanun leyhası vaqtınca işğal etilgen Qırım Muhtar Cumhuriyeti, Aqyar şeeri, Donetsk ve Lugansk vilâyeti topraqlarında yaşağan gençlerni ve başqa şahıslarnı, şu cümleden, COVİD-19 neticesinde elâk olğan ekimlerniñ balalarını aliy oquv yurtlarına qabul etüvge bağışlanğandır.
Ukraina Prezidentiniñ Qırım MC-deki Temsilciligi işbu qanun leyhasına qol tuta ve Ukraina halq deputatları onı tez vaqıtta, nevbetteki sessiya aftasında qabul eteceklerine ümüt ete.
Tasil aqqında qanunğa 3734 qanun leyhası ile teklif etilgen deñişmeler, vaqtınca işğal etilgen topraqlarnıñ sakinlerinen turğun bağ tutuv yolunda kerçekten de müim bir adımdır. Rey berüv müsbet neticege ketirse, Qırım ile Donbastan kelgen gençler içün memleketniñ bütün aliy oquv yurtları öz qapılarını açar, bücet esabına oqumaq imkânı içün belgilengen kvota çerçivesinde yarışmaq kerek olacaq. Bügünde-bügün vaqtınca işğal etilgen topraqlardan kelgen studentlerniñ ukrain aliy oquv yurtlarındaki sayısı 1%-dan azdır. Demek, devletimiz olar içün mütenasip şaraitler yaratmadı. Amma hatalarnı şimdi bile tüzetmek mümkün. Qanun leyhası aliy oquv yurtlarınıñ azırlıq kurslarında bir yılğa qadar bedava oqup, stipendiya almaq ve kelecek yıl aliy oquv yurtına kirmek imkâniyetini bergeni de pek müimdir. Bu, vaqtınca işğal etilgen topraqlarda yaşağan balalarnıñ, ebet, bütün işğal etilgen topraqlarda – Qırımda ve Ukraina şarqında yaşağan balalarnıñ ğayrıdan interatsiya etilüvine alıp barğan müim ve kerçek adımlardan biridir. Balalarımıznıñ qalpleri ve miyleri içün küreşke bağışlanğan kündelik faaliyetimizde teren manalar bar. Olarnıñ kelecekleri işğalcilerden serbest olması oğrunda çalışamız. Olar ise devletlerinden eñ müim sözlerni eşitmeliler: ”Seni mında bekleyler!” – dep izaatlay Ukraina Prezidentiniñ Qırım MC-deki Daimiy Temsilciniñ Birinci muavini Darya Svırıdova.
”Aliy tasil aqqında” Ukraina qanunına teklif etilgen deñişmelernen vazifelerini yerine ketirgen arada elâk olğan arbiyler, arbiy areketlerniñ işirakçileri, Ukraina milliy gvardiya, fevqulâde vaziyetler boyunca Ukraina devlet hızmeti, Ukraina milliy polisi, Ukraina devlet sıñır hızmeti, Ukraina havfsızlıq hızmeti hadimleriniñ balaları ve tacmaraz hastalığı neticesinde elâk olğan ekimlerniñ baları da faydalana bilir.
