2018 senesi boş ay (noyabr) 19 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ baş mesleatçısı Valeriya Pahomova Ukrainada AHİT Mahsus nezaret etici missiyasınıñ Reisi, Elçi Erturul Apakan ve AHİT MNEM vekâletli hadimleri ile iş körüşüvni keçirdiler.

Körüşüv esnasında Borıs Babin Temsilcilikniñ kündelik faaliyeti, Hersondaki AHİT MNEM ofisi ile işbirlik ve AHİT idareleri ile beraberlikte keçirilgen tedbirler aqqında haber etti. İstilâci devletniñ Azaq deñizinde ve Keriç boğazında ticariy gemicilikke ve vaqtınca işğal etilgen Qırım civarındaki deñiz suvlarınen başqa faydalanuv şekillerine tesir etmek ıntıluvı ile bağlı olğan vaziyet muzakere etildi ve ‘‘Qırım titanı’’ ile Şimaliy Qırımdaki başqa şirketlerniñ faaliyeti neticesinde yüz bergen ekologik vaziyet aydınlatıldı.

Daimiy Temsilci, sanktsion cedvelinde bulunğan şirketke ait olğan ‘‘Mehanik Pogodin’’ tankeriniñ faaliyetini toqtatuv boyunca Ukraina akimiyet organlarınıñ ve AHİT MNEM areketlerini tarif etti. Taraflar Qırımdan köçürilgen şahıslarnıñ aq-uquqlarını qorçalavda AHİT MNEM rölüni ve Kreml siyasiy mabuslarınıñ qorantalarına yardım berüv meselesini muzakere ettiler.

Elçi Erturul Apakan öz nevbette Ukrainanıñ egemenligine ve topraq bütünligine qol tutuvını tekrarlap, AHİT MNEM vekâletleri çerçivesindeki bütün nezaret ceryanlarınıñ quvetleştirilüvine qol tutmağa vade etti.