Ürmetli ukrainalılar!
Bügün parlamentte emiyeti fevqulâde derecede olğan, qorçalavıñız, havfsızlığıñız, Ukrainanıñ havfsızlığı, egemenligi ve topraq bütünligi ile doğrudan-doğru bağlı olğan bir mesele baqılacaqtır.
Ukraina milliy mudafaa ve havfsızlıq Şurası bu gece qabul etken qararğa binaen, Ukraina Prezidenti ve Ukraina silâlı Quvetleriniñ Baş Komandanı olaraq men, Esas qanun boyunca öz borcumnı yerine ketirdim ve bir qaç saat evelsi fermanım ile Ukrainanıñ bütün topraqlarında boş ay 28 künü saat 9-dan başlap, cenk vaziyetni ilân ettim.
Rusiye beş yıl devamında Ukrainağa qarşı gibrid cenkini alıp barmaqta. Amma ukrain katerlerine yapqan ücümi ile o, tecavüzniñ yañı basamağına çıqtı. Endi iç kimse ‘‘Olar anda yoq’’ dep aytamaz. İç kimse eşil adamçıqlarnıñ, ya da isyancılarnıñ qıyafetine kirmey. Bu Rusiye Federatsiyası arbiy bölükleriniñ yüzsüz ve açıq iştiragi ile Ukraina Silâlı Quvetleriniñ bölügine yapılğan ücümidir. Bu bam-başqa vaziyet, keyfiyeti başqa olğan telükedir.
Elbette, bu tesadüfen yapılğan bir ücüm degil. Bu, Azaq deñizinde bir qaç ay devam etken vaziyetni kerginleştirmek niyetinen rusiyeliler planlaştırıp yapqan bir arekettir. Eminim ki, olar bunınen sıñırlanmazlar.
Abiyler ile diplomatlar bügünki matbuat konferentsiya devamında sizge tünevinki vaqianı tarif ettiler.
İstihbarat Ukrainağa qarşı yer üstünden ameliyatnıñ ihtimalı pek yüksek olğanını bildire. Elimde istihbarattan kelgen vesiqa, istihbaratta olğan malümatlarnıñ toplamı bulunmaqta. Bir qaç saifede sıñırımızdan bir qaç on kilometr uzaqlığında turğan ve Ukrainağa deral ücüm etmege azır olğan bütün duşman küçleri tafsilâtlı şeklde tarif etilgendir. Duvarda asılğan tüfek ertemi-keçmi, ille de atar. Mında ise – uçaqlar, vertolötlar, tanklar, raketa kompleksleri, zırhlı maşinalar ve zalp ateşi sistemaları bulunmaqta.
‘‘Cenk vaziyeti uquqiy tertibi’’ qanunı bergen bütün imkânlardan ‘‘Cenk vaziyetni ilân etüv aqqında’’ Fermanğa, menim Fermanıma esasen çeşit türlü arbiy tedbirlernen bağlı olğanlar kirmekte – qorçalavnı deral quvetleştirmek kerekmiz. Ücüm alında bizge tez cevap bermege, bütün imkânlarımıznı toplamağa fırsat yaratqan (muarririyetten – tedbirler). Yedekniñ birinci nevbetinde turğan, arbiy tecribeleri olğan oğlanlar ve qızlar sırt çantalarını toplamağa azırlar, onıñ içün adamlarımız da, silâmız da, maliyemiz de azır olacaq.
Fermanımda vatandaşlarnıñ aq-uquqlarını ve serbestliklerini sıñırlağan, tsenzuranı kirsetken iç bir türlü tedbirler olmağanını qayd etmege isteyim. Ümüt etem ki, siyasetçilerimiz de, matbuat vastalarımız da bu vaziyette mesüliyetli davranıp, rusiye propagandistlerinden alınğan şiarlar ile Ukrainağa ücüm etmezler.
Onıñ içün al-azırda tolu ya da qısmen mobilizatsiyanı başlamaq kibi niyetim yoq –yalıñız Rusiye vaziyetni kerginleştirmege devam etse, bu imkânnen faydalanırmız.
Cenk vaziyeti ”cenkni ilân etüv” manasına kelmey. O yalıñız Rusiye tecavüziniñ artması şaraitlerinde Ukraina mudafaasını quvetleştirmek maqsadınen amelge keçirildi. Cenk vaziyeti Şarqtaki vaqialarnı siyasiy-diplomatik yolnen çezmekten vazgeçtik anlamına da kelmey. Bu aqta bügün bizim şarqiy ortaqlarımıznı tafsilâtlı şekilde haberdar ettim, bügünki sabadan başlap, NATO Baş kâtibi Yens Stoltenberg, Lehistan Prezidenti Anjey Duda (çünki Lehistan al-azırda Ukrainanıñ mevamını taqdim ete ve BMT Havfsızlıq Şurasında bu vaqianı muzakere etmek teşebbüsi ile çıqtı), Almaniya Kantsleri Angela Merkel ve daa bir çoq insanlarnen sübetlerim olıp keçti ve muzakereler bu aqşam devam etecek. Sizge şunı bildirmek isteyim ki, Şarqtaki ve Azaq deñizindeki vaziyetke olarnıñ diqqatları bayağı arttı. Bügün bizni tünevinge ya da o birisi künge köre daa yahşı eşiteler.
Ürmetli dostlar, aziz ukrainalılar!
Bizim umumiy boyun-borcumız ve ilk nevbette Baş komandan olaraq menim şahsiy mesüliyetim – Ukrainanı qorçalamaqtır. Ukrainanı qorçalamaq – yalıñız onıñ topraqlarını ya da arbiy tehnikanı qorçalamaq degildir. Bu ilk nevbette adamlarımıznıñ qorçalavıdır. Tecavüziy, aqılsız ve, yazıqlar olsun ki, adımları evelden tahmin etile bilir qomşumıznıñ çeşit türlü areketlerine azır olmalımız.
Elbette, insanlarnıñ serbest saylav aqlarınıñ qorçalanması aqqında da söz yürsetile. Tek işançlı mudafaa, tek mudafaa saasında ğayretlerimizniñ eki, üç kere artması tınçlıqnı kefil eter ve bu cümleden saylavlarnıñ keçirilüvi içün imkân yaratır.
Milliy havfsızlıq ve mudafaa Şurası maña bügün 60 künlik cenk vaziyetini ilân etmege tevsiye etti. Sizge qararımnı bildirmek isteyim – Parlamentke 30 künlik cenk vaziyetini ilân etmege teklif etecem. Ne içün? Cenk vaziyetiniñ iç bir küni saylav kampaniyasınıñ başlanmasına rast kelmesin dep. Öz siyasiy fırqasını, öz siyasiy menfaatlarını milletten ve ukrain menfaatlarından ziyade tüşüngen insanlarda kirli siyasiy mühtekirlikler ve hayallar içün manaçıq qalmasın dep.
Cenk vaziyeti otuz kün devam etip, ilk qış (dekabr) ayınıñ ortasında bitecek. İşte ilk qış ayında, yani ilk qış ayınıñ başında men Esas qanunğa binaen, 2019 senesi saban (mart) 31 künü keçirilecek prezident saylavlarınıñ künü aqqında qarar leyhasını Parlamentke taqdım etecem. Noqta. Baş komandan olaraq men bu qısqa müddet içinde, bir ay devamında istilâcı devlet Rusiyeniñ ihtimalı olğan ertaraflama ücümine qarşılıq kösterüv qabiliyetimizni arttırmaq üçün bütün imkânlarnı qullanmağa tırışarım.
Ukrainağa şan-şüretler olsun!