2018 senesi (fevral) kiçik aynıñ 26 künü Ukraina Prezidentiniñ Qırım MC-de Daimiy Temsilciniñ Birinci muavini İzet Gdanov Varşava şeerinde Poloniyanıñ Halqara münasebetler institutında olıp keçken ‘‘Ukrainada rusiye istilâsı: balans ve istiqbal’’ mevzusında konferentsiyada iştirak etti.

Birinci muavin qayd etti ki, 4 sene içinde Rusiye Qırımnı ne maqsat ile işğal etkenini er kes yahşı añladı – istilâcı qomşu devletlerge, ilk nevbette, Qaradeñiz regionında bulunğanlarğa basqı yapmaq içün arbiy bazanı teşkil etti. Qırımda işğalniñ ilk künlerinden başlap qırımtatar halqına ve ukrainalılarğa qarşı repressiyalar yapılmaqta. 65 siyasiy mabüs qanunsız alda azatlıqtan marum etildi. Bügünki Ukraina rusiye istilâsına qarşılıq kösterüvniñ birinci noqtasıdır. Ukraina Silâlı Qüçleriniñ küreşi, halqara basqısı ve qabul etilgen sanktsiyalar sayesinde istilânıñ başqa topraqlarğa devam etmesi toqtatıldı, amma bu mesele tolu şekilde ancaq Ukrainanıñ bütün sıñırları ğayrıdan tiklenüvinen, bu cümleden, Qırımnıñ ve Donbassnıñ qaytarıluvınen çezilecektir. Bizni ayrı siyasiy fırqalarnıñ ya da şahsiy menfaatlarınıñ oğrunda areket etip Qırım meselesini körmemezlikke urğan bazi avropalı siyasetçilerniñ adımları ve beyanatları raatsızlandıra. Olar ilk nevbette Donbass meselesini çezecek olalar. Amma bu meselelerniñ ekisi de bir vaqıtta çezilmeli. Başta Qırım işğal etildi, Donbassta ise Rusiye, öz ordusını qullanıp, Ukrainağa ve bütün halqara cemiyetke Qırım meselesini unuttırmaq içün ukrain vatandaşlarını öldürmeğe başladı.

Bu arada Qırımda gibrid şekilde ealige qarşı küreş kete. İşğalciler qırımtatar halqınıñ medeniy asabalığını yoq eteler. Buña razı olmaq mümkün degil ve bu yalıñız Ukraina devletiniñ meselesi de degil, bütün medeniy dünya içün büyük telükedir. Onıñ içün, vaqıt coymadan Rusiye içün öyle iqtisadiy şaraitler yaratılmalı ki, bu devlet halqara qanuniyetke ve qabul etilgen sıñırlarğa riayet etmege başlasın. Qırımnıñ statusına kelgende ise, bu pek muim mesele, Prezidentniñ avalesine binaen Anayasa komissiyası onıñ üstünde öz işini alıp barmaqta