Ukraina Prezidentiniñ Qırım MC-deki Daimiy Temsilcisi Anton Korınevıç ”Ukrainanı ve Gürcistannı işğalden azat etüv: eki devletniñ, halqara teşkilâtlarnıñ ve grajdan cemiyeti teşkilâtlarınıñ umumiy ğayretleri” mevzusında onlayn muzakere etüvde iştirak etti. Gürcistannıñ Ukrainadaki Elçihanesi / უკრაინის საელჩო საქართველოში.

Çıqışı esnasında Anton Korınevıç Qırım Muhtar Cumhuriyetiniñ ve Aqyar şeeriniñ işğal etilüvine qarşılıq kösterüv Künü şimdiden başlap Ukraina Prezidentiniñ 58/2020 sanlı Fermanı esasında er yıl qayd etilecegini bildirdi.

Daimiy Temsilci ayrıca vaqtınca işğal etilgen Qırım Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüv, vaqtınca işğal etilgen yarımadanıñ ealisi ile bağlarnı qorçalav oğrunda Ukraina tarafından keçirilgen tedbirlerni qayd etti, vaqtınca işğal etilgen Qırım MC ile Aqyar şeerinde insan aqları ciddiy şekilde bozulğanını haber etti ve COVİD-19 ile bağlı vaziyetni talil etti.