2018 senesi berim (sentâbr) ayı 17 künü ‘‘Yañı Avropa’’ Kıyiv analitik merkezi Buharestte «Primorye» (Baltıq deñizinden Qara ve Adriatik deñizlerine qadar Merkeziy-Şarqıy Avropanıñ 12 devletinden ibaret olğan ortaq blok) sammitiniñ keçirilüvi munasebeti ile ‘‘Üç deñizniñ teşebbüsi’’ mevzusında muzakere keçirildi.
Ukrainanıñ Avropağa integratsıyasına bağışlanğan tedbirde Temsilcilikteki halqara alâqalar hızmetiniñ yolbaşçısı Yevgen Samuha iştirak etti. Tedbirde Ukrainada Romaniyanıñ Elçisi Kristian-Leon Tsurkanu, Ukrainada Lehistan elçihanesiniñ vekili Tomaş Buyko, Ukraina Yuqarı Şurası Başlığınıñ tışqı siyaset boyunca muşaviri Ostap Krıvdık ve ukrainalı diplomat Markiyan Lubkivskiy çıqışta bulundılar.
Tedbir esnasında Ukraina içün işbu leyha çerçivesinde al-azırda mevcut olğan imkânlar penceresi ve umumen devletimizniñ ‘‘Üç deñizniñ teşebbüsine’’ munasebeti muzakere etildi. ‘‘Trimorya’’ leyhasında iştirak etken devletlerden diplomatlar leyhanıñ istiqbalini ve esas yönelişlerini belgilediler ve AB çerçivesinde iqtisadiy-infrastruktura leyhasında Ukrainanı başta közetici, kelecekte ise, devletimizge energetik, naqliyat, teleyayınlav ve başqa iqtisadiy saalarda yardım köstermek maqsadınen onı Avropa Birliginiñ tolu derecede azası olaraq beklegenlerini bildirdiler.
Ukrainanıñ ‘‘Üç deñizniñ teşebbüsine’’ celp etilüvine ayrıca aza devletlerniñ vastası ile RF qarşılıq kösterip, leyhanı siyasiy ittifaqqa çevirmege tırışqanı da qayd etildi.