2018 senesi berim (sentâbr) ayı 20 künü Temsilcilikte halqara alâqalar hızmetiniñ reisi Yevgen Samuha ve halqara alâqalar hızmetiniñ baş mesleatçısı Valeriya Pahomova Ukraina Yuqarı Şurasınıñ tışqı işler boyunca Komiteti tarafından teşkil etilgen ‘‘Rusiye istilâsı: Ukrainanıñ sankstıyalar saasında siyasetini halqara ortaqlarnen uyğunlaştıruv’’ mevsuzında tögerek masada iştirak ettiler. Tögerek masada Ukraina Yuqarı Şurasınıñ çetel işler boyunca Komitetiniñ başlığı Ganna Gopko, Ukraina Yuqarı Şurası reisiniñ söz serbestligi ve haber siyaseti meseleleri boyunca muavini Sergiy Vısotskiy, Ukraina Yuqarı Şurası milliy havfsızlıq ve mudafaa meseleleri boyunca Komitetinde devlet havsızlığı meseleleri boyunca bölüginiñ Yolbaşçısı Andriy Levus, ‘‘Ukrain strategik teşebbüs’’ cemaat teşkilâtınıñ Müdiri Aşot Topçan, ‘‘Serbest insanlar’’ cemaat teşkilâtı merkeziniñ reisi Dmıtro Jmaylo, komitetlerniñ azaları ve kâtibiyetlerniñ hadimleri, icra akimiyeti merkeziy organlarnıñ vekilleri ve jurnalistler iştirak etti.
Tögerek masa esnasında Ukrainanıñ sanktsıyalar boyunca siyasetiniñ qusurları ve olarnı tüzetüv yolları, vaqtınca işğal etilgen topraqlarnıñ azat etilüvini tezleştirebilecek halqara sanktsıon vastaları muzakere etildi. Ukrainanıñ sankstıyalar saasında siyasetiniñ halqara ortaqlarnen uyğunlaştırıluvı kerek olğanı da qayd etildi. Temsilcilikniñ hadimleri ‘‘«Qırım» serbest iqtisadiy zonanı teşkil etüv ve Ukrainanıñ vaqtınca işğal etilgen topraqlarında iqtisadiy faaliyetniñ hususiyetleri aqqında’’ qanunnıñ çoqusı maddelerini yasaq etmege kerek olğanı aqqında tarif ettiler ve ‘‘Tışqı iqtisadiy faaliyet aqqında’’ Ukraina qanunı boyunca sanktsıyalarnıñ işletilüvini Ukraina iqtisadiy inkişaf ve ticaret Nazirligi tarafından semereli şekilde nezaret etmege kerek olğanını qayd ettiler. Bundan da ğayrı, Temsilcilikniñ hadimleri ‘‘Sanktsıyalar aqqında’’ Ukraina qanuniyetini amelge keçirüvinen bağlı problemalarnı ve olarnı tüzetüv yollarını tarif ettiler.