Sentyabr 13 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin ”Tamır halqlarınıñ aq-uquqları aqqında BMT Deklaratsiyası qabul etilüviniñ yıldönümine bağışlanğan qırımtatar alem-aşkâre diplomatiyasınıñ yekünleyici tedbiri’’ serlevalı tögerek masada iştirak etip, bügünde-bügün qabul etilgen ya da Yuqarı Şurada leyha olaraq qayd etilgen Ukrainanıñ tamır halqlarınıñ aq-uquqlarını qorçalağan bir de bir qanun mevcut olmağanını bildirdi. Bundan da ğayrı, Boris Babin Deklaratsiyada qayd etilgen tamır halqlarınıñ aq-uquqları qorçalavına dair Ukraina Anayasasınıñ X bölügine kirsetilecek deñişmelerge umumiy nazar noqtası da al-azırda mevcut olmağanına tedbirde bulunğanlarınıñ diqqatını celp etti.

Daimiy Temsilcisi qayd etkenine köre, Qırım – Ukrainanıñ tamır halqlarınıñ – qırımtatarlarnıñ, qaraimlerniñ ve qırımçaqlarnıñ – tarihiy Vatanıdır, şimdi Rusiye tarafından işğal etildi, onıñ içün bügünde-bügün biz ayırımğa oğratılğan tamır halqlarınıñ aq-uquqlarını qorçalamaq içün faal şekilde halqara mehanizmlerni işletmege kerekmiz.

Tedbirniñ iştirakçilerini hayırlağan Tamır halqlarınıñ meseleleri boyunca BMT Daimiy forumnıñ başlığı Mariam Uolet, halqara ve ukrain teşkilâtlarnı işğal olunğan Qırımda qırımtatarlarnıñ vaziyetini deñiştirmek maqsadınen semereli faaliyet yürsetmege çağırdı.

”Al-azırda ögümizde bir çoq mesele turmaqta. Qırımtatarlarnıñ Qırımda şimdiki vaziyetlerini deñiştirmek içün semereli bir şekilde çalışmalımız. Sübesiz ki, tamır halqlarınıñ aq-uquqları qorçalavı boyunca minimal standartlarğa riayet etmelimiz ve aynı zamanda halqara diplomatiyasından milliy qorçalav seviyesine keçmelimiz”, – dep qayd etti tögerek masa devamında Mariam Uolet.