2018 senesi fevral 9 künü Ukraina Prezidentiniñ Qırım Muhtar Cumhuriyetindeki Temsilciliginiñ uquqiy talil ve halqara alâqalar hızmetleriniñ vekilleri Ukraina Şurasınıñ Komitetinde «‘‘Qırım’’ serbest iqtisadiy zonasınıñ teşkil etilüvi ve vaqtınca işğal etilgen topraqlarda iqtisadiy faaliyetniñ hususiyetleri» aqqında Ukraina qanunına kirsetilecek deñişmeler boyunca iş gruppasınıñ oturışında iştirak ettiler.

Körüşüvde Ukraina halq deputatı Refat Çubarov, sabıq Ukraina halq deputatı Andriy Şençenko, devlet akimiyetiniñ, cemaat teşkilâtlarınıñ, ekspert merkezleriniñ vekilleri ve uquqqoruyıcılar iştirak ettiler.

Oturış devamında memleket içinde mecburen köçken şahıslarğa devlet kefaleti berilüviniñ tertibi, olarğa Ukrainada rezident olmağanlar statusınıñ berilüvi, mülkiyet aqlarınıñ qorçavı, vaqtınca işğal olunğan Qırım Muhtar Cumhuriyeti ile memuriy sıñırdan keçüv ve mallarnı keçirüv, KÇNN-da qümrük nezaretiniñ kerekligi ve bergilendirme meseleri talil etildi.

Bundan da ğayrı, oturış devamında ”Vaqtınca işğal etilgen topraqlardan Ukrainanıñ diger qısımlarına ve Ukrainanıñ diger qısımlarından vaqtınca işğal etilgen topraqlarına bazı mal ve hızmetlerniñ keçirilmesi aqqında” Ukraina ükümetiniñ № 1035 qararına deñişmeler kirsetmege kerek olğanı qayd etildi. Oturışta bulunğanlarınıñ episi onıñ lâğu etilmesine, ya da uquqiy-normativ aktlarına deñişmeler kirsetilmesine qol tuttı, Ukraina maliye nazirliginiñ temsilcileri ise qanunnıñ lâğu etilmesinen bağlı sübelerini seslendirdi. Oturışnıñ soñunda iştirakçiler kelecekteki faaliyetlerini ve nevbetteki oturışnıñ kününi belgilerdiler.