Mayısnıñ 14-nde Ukrayina Yuqarı Radası 1944 senesi qırımtatar halqınıñ sürgünligini genotsid aktı olaraq tanılmasına dair çetel devletlerniñ ükümetlerine, halqara teşkilâtlarğa ve parlament assambleyasına muracaat etüv aqqında №15227 qararnı qabul etti.

Qarar qırımtatar halqı sürgünliginiñ 82 yıllığı arfesinde qabul etildi.

Vesiqa halqara toplulıqnı sovet totalitar rejiminiñ qırımtatar halqına qarşı yapqan cinayetlerine uquqiy ve siyasiy seviyede qıymetlendirmege, rusiye federatsiyasınıñ Qırımnıñ vaqtınca işğali şaraitlerinde qırımtatarlarğa qarşı diskriminatsiya, taqip ve repressiyalarnı devam etken zemaneviy siyasetini takbih etmege, rusiyege qarşı sanktsiyalar ve diplomatik basqını quvetleştirmege çağıra.

Ukrayina, 1944 senesi qırımtatar halqınıñ Qırımdan sürgün etilmesini genotsid olaraq tanığan dünyada ilk devlet oldı.

Ondan soñ diger devletler de böyle qararlarnı qabul etti, şu cümleden, Latviya Cumhuriyeti, Litvaniya Cumhuriyeti, Poloniya Cumhuriyeti ve Estoniya Cumhuriyeti parlamentleri, Kanada Cemaat Palatası, Felemenk Qırallığı Temsilciler Palatası ve Çehiya Cumhuriyeti Senatı.