Ukraina Prezidentiniñ Qırım Muhtar Cumhuriyetindeki Temsilciligi sizni Qırımnıñ işğalinden soñ ilk kere keçirilgen «TATLI SES» halqara televizion bala istidatları yarışınen can-yürekten hayırlay. Şunı qayd etmelimiz ki, bu yarış qırımtatar milliy sanatınıñ ğayrıdan tiklenüvine ve saqlanuvına, gençler ve balalar arasından istidatlı icracılarnıñ inkişafına hızmet ete.

İstidatlı gençlik öz qabiliyetlerini meydanğa çıqarıp, seçip alğan kategoriyada istidatlarını numayış ete, dostlarınen alâqalarını qaviyleştire, qırımtatar milliy sanatını sevdire, seyirci olaraq salonda bütün bulunğanlar ise qırımtatar medeniyetine yaqınlaşa ve artistlerniñ çıqışlarından zevq ala bile.

Al-azırda Ukraina Prezidentiniñ Qırım Muhtar Cumhuriyetindeki Temsilciligi Qırımnıñ eñ yaqın vaqıtta qaytarıluvı ve Rusiye istilâsına qarşılıq kösterilüvi, Ukraina vatandaşlarınıñ, bu cümleden, işğalci akimiyet tarafından kütleviy şekilde cezalavğa oğrağan qırımtatar halqınıñ menfaatlarınıñ qorçalavı içün elinden kelgenlerini yapa.

Merasimniñ teşkilâtçısı olğan ve Qırımnıñ işğali sebebinden Kıyiv şeerinde bulunğan Birinci qırımtatar ‘‘ATR’’ telekanalına samimiy teşekkürimizni bildiremiz.

Rusiye istilâsı şaraitlerinde tamır halqınıñ medeniyetiniñ qorçalanması pek muimdir. İşğalciler qırımtatar medeniyetini yoq etmek içün elinden kelgenlerini yapa. Medeniyet olmasa, halq da yoq olur!

Böyle merasimler, Qırım Muhtar Cumhuriyetiniñ qaytuvını yaqınlaştırıp, Ukrainanıñ vaqtınca işğal olunğan topraqlarınen birlik ve birleşüvine, alâqalarnıñ üzülmemesine, balalarnıñ ve gençlerniñ medeniy ve ruhiy inkişafına hızmet eter.

Ümüt etemiz ki, yarış iştirakçileriniñ tecribeleri qırımtatar medeniyetiniñ, ananeleriniñ inkişaf etmesi ve rağbet qazanması içün qüzel işaret olur.

Emin oluñız ki, biz mıtlaqa qaytarmız!

Qırım serberst olacaq!

Ürmet ile,

Ukraina Prezidentiniñ Qırım Muhtar Cumhuriyetinde

Daimiy Temsilcisi vazifesini vaqtınca becergen                                     İzet Gdanov