Bugün, aprelniñ 30-nda, Üzeir Abdullayev 51 yaşını toldura. Bu onıñ rus cezahanesinde keçirgen doquzıncı doğğan künüdir. Ukraina vatandaşı, qırımtatarı, sportçı, idmancı, dört balanıñ babası — Üzeir diniy ve milliy mensüpligi sebebinden serbestliginden marum qaldı.

Üzeir 1974 senesi Bakuda doğdı ve qırımtatar ile azerbaycan tamırları birleşken qorantada büyüdi. O, balalıqtan şarqiy küreşüvlernen oğraşqan, uquqşınaslıq tasilini alğan, amma idmancılıq faaliyetini seçken. Qırımda qoranta qurğan, ömür arqadaşı Feranen dört bala östürip, Mekkege hac yapqan. 2016 senesi oktâbrniñ 12-nde Aqmescit rayonınıñ Strogonivka köyünde yapılğan kütleviy tintüvler vaqtında işğalci telükesizlik küçleri onı qardaşı Teymurnen beraber qanunsız tevqif etti.

2019 senesi iyünniñ 18-nde rostov-na-donu “mahkemesi” Teymur ve Üzeir Abdullayevlerge qarşı qanunsız üküm çıqarıp, Teymurnı 17 yılğa, Üzeyini ise 12.5 yılğa mahküm etti. 2019 senesi dekabr ayında rf yuqarı mahkemesi olarnıñ apis müddetini 6 ayğa qısqarttı. Al-azırda Üzeir evden 1500 kilometrden ziyade uzaqlıqtaki başqırtistan cumhuriyetiniñ salavat şeerindeki 16-ncı tüzetüv koloniyasında, qardaşı ise 2-ncı tüzetiş koloniyasında bulunmaqta.

Üzeir Abdullayevniñ tutuluv şaraitleri ciddiy raatsızlıq doğura. Oña qazanılğan yürek qusurı, ayaqlarınıñ hronik şişikligi, allergik rinitniñ keskinleşmesi, dımlı ve suvuq kameralarda uzun vaqıt bulunğanından daima ağrılar diagnozı qoyuldı.

“Aslında, men imayesiz qaldım – men balalarımnı FSİN hadimleri tarafından yapılğan basqı ve qanun bozuvlardan qorçalap olamayım. Ne de olsa, ağır hasta olğan büyük oğlum ceza izolâtorında tutulmaqtan ğayrı, bütün mümkün olğan basqı şekillerine oğray, onıñ hastalıqlarınen de, ceza izolâtorında tutulması mümkün degil”, – dep qayd etti Üzeir ve Timurnıñ anası Dilâra Abdullayeva öz Facebook saifesinde.

Üzeir Abdullayevniñ ikâyesi vaqtınca işğal etilgen Qırımda rus işğalci idaresi tarafından alıp barılğan repressiyalarnıñ siyasiy sebeplerden sistemalı olğanını köstere. Onıñ davası diniy, etnik ve siyasiy sebeplerden taqip etilgenlerniñ misalidir.

Üzeir Abdullayevniñ doğğan kününde biz birdemlik kösterip, siyasiy ve diniy sebeplerden Rusiye tarafından qanunsız tutulğan bütün Ukraina vatandaşlarınıñ azat etilmesini talap etemiz.