UNESCO-nıñ maruzası yarımadada tasil ve ilmiy faaliyetleri azlaşqanını, Qırım medeniy ceetten degradatsiyağa oğrağanını qayd ete ve işğal etilgen topraqlarnıñ tarihiy ve medeniy asabalıqlarınıñ hırsızlanuvına qarşılıq kösterüvge ayrıca diqqat ete. Maruza işğalci devlet qırımtatarlarnıñ ve ukrainlerniñ tasil, ana tilni qullanuv ve matbuat vastalarnıñ serbestligini temin etüv saalarında aqlarını qaba şekilde bozğanını aydınlata.

Yuqarıda qayd etilgen maruza Qırımdaki medeniy asabalığına, tarihiy ve mimariy abidelerine, müzeylerine, tabiy qoruqlarına ve ilmiy merkezlerine Ukrainanıñ irişimi olmağanını bildire. UNESCO-nıñ maruzasında qanunsız arheologik qazmalar ve işğal etilgen yarımadadan medeniy qıymetlerniñ çıqarıluvı aqqında haber etile, sözde ‘‘restavratsiya’’ sebebinden antik Hersones şeerinde ve Bahçasaraydaki Hansarayda vaziyet boyunca raatsızlıq beyan etile. Maruza UNESCO Kâtibiyetiniñ malümatları ve ortaq teşkilâtlar, bu cümleden İnsan aqları boyunca BMT Yuqarı komissarı İdaresi, AHİT, Avropa Şurası, cemaat teşkilâtları ve ukrain tarafı bergen malümatlar esasında tertip etildi.