Ukraina tasil ve ilim Nazirligi 2021 senesi saban ayınıñ 1-de qabul etken 271 sanlı Ferman 2021 senesi çiçek ayınıñ 15-de Ukraina adliye Nazirligi tarafından 505/36127 nomerası ile tasdıqlandı.

Tertip vaqtınca işğal etilgen Qırım Muhtar Cumhuriyeti ve Aqyar şeeri topraqlarında, Donetsk ve Lugansk vilâyetleriniñ vaqtınca işğal etilgen ayrı rayonlarında, çatışuv çizgisi topraqlarında bulunğan mesken yerlerde yaşağan balalarğa tasil almaq imkânını berir. Yani olar:

📌eryıllıq baalav ile devlet yekünleyici baalavdan keçe bile;
📌orta tasil ya da tolu orta tasil aqqında şeadetnamelerini ala bile;
📌(belgilengen kvotalar çerçivesinde konkurs esasında) ya da (isteseler) tışqı mustaqil baalavnıñ neticeleri esasında aliy ve mahsus oquv yurtlarına kire bile;
📌zenaat-tehnika oquv yurtlarına qabul etile bile;
📌bir tasil merkezi vastasınen 5 farqlı bölükke arizalar tapşıra bileler.

Aliy ya da mahsus oquv yurtları temelinde teşkil etilgen (vaqtınca işğal etilgen Qırım Muhtar Cumhuriyeti ve Aqyar şeeri topraqlarından muracaat etkenler içün) ”Qırım-Ukraina” tasil merkezleri ve (Donetsk ve Lugansk vilâyetleriniñ vaqtınca işğal etilgen ayrı rayonlarında, çatışuv çizgisi topraqlarında bulunğan mesken yerlerden muracaat etkenler içün) ”Donetsk-Ukraina” tasil merkezleri bu yönelişte faaliyet yürseteler.

Tasil merkezleri 2021 senesi ilk yaz ayınıñ 7-den başlap, berim ayınıñ 24-nece çalışacaqlar.

Tafsilâtlı malümat Ukraina tasil ve ilim Nazirliginiñ saifesindedir:https://cutt.ly/ebh3jPz