Bugün, ilk yaz ayınıñ 16-da, Ukraina Nazirler Şurasınıñ toplaşuvında SARS-CoV-2 tacmarazı sebebinden COVİD-19 hastalığınıñ Ukraina topraqlarında peyda olıp darqaluvına qarşılıq kösterüv maqsadınen 2021 senesi arman ayınıñ 31-nece karantin devam ettirildi ve epidemiyağa qarşı sıñırlayıcı tedbirler amelge keçirildi, aynı vaqıtta ilk yaz ayınıñ 17-den başlap, bütün Ukraina topraqlarında ”yeşil” seviye üküm sürecektir.

Ukrainada epidemiologik havfsızlıq ”yeşil” seviyede olğan vaqıtta bir-de-bir memleketten kelgen Ukraina vatandaşları ya da Ukrainada resmiy şekilde yaşağan ecnebiyler devlet sıñırını maniasız keçe bileler. Aynı maniasız şekilde Ukraina vatandaşları vaqtınca işğal etilgen topraqlarnen memuriy sıñırdaki kiriş-çıqış nezaret etüv noqtalarını keçe bileler.

Böyleliknen, deñişmeler amelge keçken soñ, ”Evde” uyğulamasını çalıştırmaq ve test tapşırmaq kerek olmaycaq.
Ukraina topraqlarında başqa havfsızlıq seviyesi amelge keçirilse, Bütündünya sağlıq saqlav teşkilâtı tarafından fevqulâde vaziyetlerde qullanıla bilecek COVID-19 hastalığından aşılamalar cedveline kirgen bir-de-bir aşılamanı tolu şekilde alğanına dair vesiqası olğan Ukraina vatandaşları içün KÇNN-dan keçit maniasız olacaqtır.

Böyle vesiqası olmağan vatandaş ”Evde” uyğulaması vastasınen öz-özüni etraf müitten ayırmalı, uyğulamanı qullanıp olamasa ya da istemese – observatsiyada bulunmalıdır.  

Qabul etilgen deñişmeler aqqında tafsilâtlı malümat Ukraina Nazirler Şurasınıñ ve Ukraina sağlıq saqlav Nazirliginiñ https://cutt.ly/EnL1HId ve https://cutt.ly/AnL7fW3 İnternetteki saifelerinde bulunmaqtadır.