Koronavirus hastalığını belgilemek ve hususan onıñ ”Delta” çeşitiniñ darqaluvına yol bermemek maqsadınen oraq ayınıñ 28-de Ukraina Nazirler Şurası 2020 senesi ilk qış ayınıñ 9-da qabul etken”SARS-CoV-2 tacmarazı sebebinden COVİD-19 keskin respirator hastalığınıñ Ukraina topraqlarında darqaluvına qarşılıq kösterüv maqsadınen karantin tedbirini ilân etüv ve epidemiyağa qarşı sıñırlayıcı tedbirlerni amelge keçirüv aqqında” 1236 sanlı qararnamesine deñişmeler kirsetti.
Qabul etilgen qarar (18 yaşını toldurmağan şahıslar istisna) Bütündünya sağlıq saqlav teşkilâtı tarafından fevqulâde vaziyetlerde qullanılması ruhset etilgen aşılamalar cedveline kirgen bir-de-bir COVID-19 aşılamasınen tolu aşılama alınğanına dair vesiqası ya da birinci COVID-19 aşılamasınıñ yapılğanına dair 063-О malümat kâğıdı olmağan şahıslarnıñ vaqtınca etilgen Qırım Muhtar Cumhuriyeti ve Aqyar şeeri topraqlarınen memuriy sıñırdaki KÇNN keçmesine tesir ete. Böyle şahıslar SARS-CoV-2 koronavirusnıñ antigenini belgilegen bedava ekspress testni tapşırmalılar.
”Koronavirusnıñ “Delta” çeşiti Garbiy Avropada ve vatandaşlarımız yaz seyahatları içün seçken memleketlerde faal şekilde darqalmaqta. Çetelde bu virusqa oğrağan şahıslardan hastalıqnıñ Ukrainada darqalmasınıñ imkâniyetini eksiltmek maqsadınen sıñırnı keçüvge dair yañı qaidelerni teklif etemiz. Bundan ğayrı, neticede hastalıqnı taşığan şahıs belgilense, daa keyfiyetli epidemiologik taqiqatlar yapa bilirmiz. COVID-19 hastalığından aşılama almağan şahıslarnı etraf müitten ayıruv ya da observatsiya tedbirleri nezaret etüvni qolaylaştırır ve hastalıqnıñ kütleviy şekilde darqaluvınıñ imkâniyetini azlaştırır”, – dep izaatladı qararnameniñ zaruriyetini Ukraina sağlıq saqlav Naziri Viktor Lâşko.
Bu qarar qararnameniñ derc olunmasından 7 kün keçken soñ amelge keçecektir. Tafsilâtlı malümat https://cutt.ly/kQohb8M.
Fursattan faydalanıp, vaqtınca işğal etilgen topraqlarda yaşağan vatandaşlarımıznı Herson vilâyetindeki aşılama noqtalarında bedava aşılama imkâniyetinen faal şekilde faydalanmağa davet etemiz.
Bundan ğayrı, haber etemiz ki, 2021 senesi oraq ayınıñ 28-de Ukraina Nazirler Şurası oturışuvında Donetsk ve Lugansk vilâyetlerinde ayıruv çizgisini, Qırım MC ve Aqyar şeeri ile memuriy sıñırnı keçüvge umumiy yanaşuvnı yerine ketirmek maqsadınen ”Ukraina Nazirler Şurasınıñ bazı qararnamelerine deñişmeler kirsetüv aqqında” qararname leyhasını qabul etti.
Qabul etilgen qararnamege binaen, Ukraina idaresi altında bulunğan topraqlarda kiriş-çıqış nezaret etüv noqtasından memuriy sıñırğace (sözde ”qırmızı sızıqqace”) ve qarşı tarafqa avtobus vastasınen naqliyat teşkil etilmeli.
Tafsilâtlı malümat https://cutt.ly/6QohSEr
Açıq menbalardan alınğan fotoresim