İşğalci akimiyetniñ vekilleri tabiat abidesi topraqlarında qanunsız şekilde qurucılıq ceryanını başladılar, böyleliknen işbu qoruq bozula bile, bundan ğayrı, deñiz yalısına irişim sıñırlanacaq.

Ukraina Prezidentiniñ Qırım Muhtar Cumhuriyetindeki Temsilciligi Qırım MC ve Aqyar şeeri Prokuraturasına mütenasip muracaatını yolladı. 2020 senesi oraq ayınıñ 3-de prokuratura ”Meganom yarımadası” tabiat abidesiniñ topraqlarında işğalci akimiyet qanunsız şekilde turistik tesislerni qurıp çıqqanı aqqında malümatlarnı Ukraina Ceza Kodeksiniñ 252-nci maddesine binaen (devlet tarafından qorçalanğan ve tabiat-qoruq fonduna ait olğan topraqlarnı aselet yoq etüvni ve bozuvnı maqsat etip qoyğan areketler) açılğan davağa qoşqanını haber etti.

Qırım yarımadasındaki Ukraina tabiat-qoruq fondunıñ yoq etilüvi ve ekologik vaziyetniñ beterleşüvi, işğalniñ aqibetlerinden biridir. Onıñ içün böyle adiselerge dair malümatlarnı toplav, olarnı tedqiq etüv ve istilâcı devletke sanktsion basqını arttıruv yarımadanıñ işğalden azat etilmesine qadar onıñ qorçalanmasına hızmet etken müim adımlardır.

Tafsilâtlı malümat Ukraina Prezidentiniñ Qırım MC-deki Temsilciliginiñ baş mesleatçısı Vladıslav Miroşniçenkonıñ maqalesinde aks etilgendir. https://investigator.org.ua/ua/investigations/232607

Foto:  FB Меганом SOS!