2018 senesi saban ayınıñ (mart) 1 künü Ukraina Yuqarı Şurasınıñ qararı ile vaqtınca işğal etilgen Qırım MC-de ve Aqyar şeerinde RF Prezidentiniñ saylavlarına azırlıq kösterilüvi munasebetinen Ukraina Yuqarı Şurasınıñ halqara cemiyetke Muracaatı qabul etildi.

Muracaatta nevbeteteki kere RF-nıñ akimiyet organları ve işğalci memuriyeti Ukrainanıñ egemenliğini ve territorial bütünligini, Qırımda insan aq-uquqlarını ve serbestliklerini bozğanları takbih etilip, RF-na ve vaqtınca işğal etilgen topraqlarda qanunsız saylavlarnı teşkil etken ayrı şahıslarğa qarşı yañı sanktsiyalarnıñ qabul etilüvi teklif etile. Muracaatta qayd etile ki, sözde ‘‘saylavlarnıñ’’ vaqtınca işğal etilgen Qırım topraqlarında keçirilüvinen olar kene de qanunsız ilhaqnı qanunlaştırmağa tırışalar. Olarnıñ qanunsız neticeleri ne de Ukraina, ne de halqara cemiyeti tarafından tanılır.

Ukraina Prezidentiniñ Qırım MC-de Temsilciligi, halq deputatları ve Ukraina Tışqı işler nazirligi beraberlikte Muracaatnıñ leyhası üstünde faal çalıştılar.