Ukraina Prezidentiniñ Qırım MC-deki Temsilciligi, Qırım Muhtar Cumhuriyeti ve Aqyar şeeri Prokuraturası, Qırım uquq qorçalav gruppası, İnsan aqları boyunca Ukraina-Helsinki birilgi, ZMİNA insan aqları merkezi beraberlikte vaqtınca işğal etilgen Qırımda tasil saasını arbiyleştirüv ve Qırım balalarında ukrain kimligini yoq etüv ceryanına alâqaları olğan şahıslar cedvelini taqdim ettiler.
Cedvel 12 kişiden ibaret, olarnıñ arasında sözde Qırım nazirleri ve mektep ocaları bardır. Şu cümleden, ”Qırım Cumhuriyeti sabıq tasil, ilim ve gençler naziri” Nataliya Gonçarova, ”Yalta şeer memuriyeti tasil idaresiniñ reisi” Renard Kutkovskıy, ”Aqyar şeeri tasil ve ilim bölüginiñ müdiri Olena Bogomolova ve digerleri.
Yuqarıda qayd etilgen cedvel vaqtınca işğal etilgen Qırımda kütleviy şekilde bala aqlarınıñ bozuluvlarına diqqat celp etmek ve kelecekte böyle bozuluvlarnıñ ögüni almaq maqsadınen teşkil etilgendir. Cedvelge kirsetilgen şahıslar tarafından ”vatanperver terbiyelev tedbirleri”, Qırım balalarınıñ miylerinde ”universal Rusiye vatandaşı” kimligini, cenk kultini, zorbalıqnı pekitip, Ukraina ve ğarbiy devletlerniñ duşman olaraq tanılmasına hızmet etüvnen beraber, sovet akimiyetiniñ cinayetlerini aqlay ve Ukraina tarihiniñ kerçeklerini gizley.
”Rusiye 2014 senesinden berli yarımadadaki fizikiy bulunuvını arttırmaqnen yetinmey, aynı vaqıtta o, yerli sakinlerniñ ayatlarını arbiyleştire. İlk nevbette, tasil saasına tesir ete. Rusiye Federatsiyasınıñ Qırımda ”qurayatqan” tertibatnıñ telükesi, balalar bağçalarında, mekteplerde ve aliy oquv yurtlarında oquğan balalarnıñ arbiyleştirüv ceryanına celp etilmesidir. Ayrıca işğal etilgen topraqlardaki ocalarnıñ ve tasil saasında çalışqan şahıslarnıñ cemisi mesüliyetke çekilecek hain olmağanına inanğanımıznı qayd etmege isteyim. Amma tasil ceryanını aselet arbiyleştirgen ve balalarnıñ kimliklerini bozğan şahıslar belli olmalı ve cinaiy areketleri içün mesüliyetke çekileceklerini añlamalılar”, – dep izaatladı Ukraina Prezidentiniñ Qırım MC-deki Temsilciliginde Qırım Muhtar Cumhuriyetini işğalden azat etüv ve ğayrıdan integratsiya etüv meseleleri boyunca hızmetniñ reisi Olena Halimon.
Videoleyha (https://cutt.ly/tjWhjJ3)