Çiçek ayınıñ 2-de Ukraina Yuqarı Şurası insaniy ve haber siyaseti meseleleri boyunca Komitetiniñ ”Ukrainanıñ vaqtınca işğal etilgen ve sıñırğa yaqın olğan topraqlarında istiqrarlı ukrain yayınlavnı temin etüv aqqında” mevsusındaki oturışuvında Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç çıqışta bulundı. O, vaqtınca işğal etilgen Qırımda yaşamağa mecbur olğan Ukraina vatandaşlarınıñ ukrain matbuat vastalarında derc etilgen Ukraina ve dünya aqqındaki kerçek ve müim haberlerge irişimlerini temin etüv aqqında ikâye etti.
”Temsilcilik vaqtınca işğal etilgen Qırım Muhtar Cumhuriyeti topraqlarında ve vaqtınca işğal etilgen Qırım Muhtar Cumhuriyeti topraqlarınen qomşu olğan Herson vilâyetiniñ cenübiy rayonlarında muntazam şekilde televizion ve radioyayınlav saasındaki vaziyetni muntazam şekilde nezaret ete. Al-azırda analog televizion yayınlav standartı yuqarıda añılğan topraqlarnıñ sakinleri irişe bilgen yekâne formattır, onıñ içün o, Ukrainanıñ topraq bütünligi ğayrıdan tiklenmesine qadar saqlanıp qalmalıdır. Yoldaştan kelgen televizion signalı kodlanğanı sebebinden vaqtınca işğal etilgen Qırımda ve Aqyar şeerinde yaşağan vatandaşlarımız içün yoldaş vastasınen yayınlağan ukrain televizion kanallarınıñ ekseriyeti irişilmez oldı.
Diñlevlerniñ neticesi olaraq berilgen tevsiyelerge Temsilcilikniñ esas teklifleri bulardır:
📌 vaqtınca işğal etilgen topraqlardan Ukraina ükümeti tarafından idare etilgen topraqlarğa köçken televizion ve radio şirketlerine ve başqa matbuat vastalarına devlet desteginiñ berilmesi içün açıq-aydın mehanizmni işlep çıqarmaq;
📌 tamır halqlarnıñ tillerinde, şu cümleden qırımtatar tilinde yayınlağan ukrain televizion ve radio şirketlerine qol tutmaq;
📌 vaqtınca işğal etilgen Qırım Muhtar Cumhuriyetini ve Aqyar şeerini işğalden azat etüv ve ğayrıdan integratsiya etüv Strategiyasını amelge keçirüvge dair tedbirler Planını azırlağanda, vaqtınca işğal etilgen topraqlarğa istiqrarlı ukrain yayınlav ihtiyaclarını diqqatqa almaq;
📌 vaqtınca işğal etilgen topraqlarğa yayınlağan şirketler içün ayırılğan maliyeni arttırmaq maqsadınen 2021 senesi içün Ukraina devlet bücetine deñişmeler kirsetmek kerek, – dep qayd etti Anton Korınevıç.