2018 senesi fevral 14 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin ve onıñ Birinci muavini İzet Gdanov ‘‘Qalançaq’’, ‘‘Çaplınka’’, ‘‘Çonğar’’ KÇNN-ları ve Herson şeerinen başqa mesken yerler arasında mütenasip ruhsetlerni almadan avto vastasınen yolcu naqliyatı boyunca faaliyet yürsetken taşıyıcılarğa qarşılıq kösterüv ve vaqtınca işğal etilgen Qırımnıñ sıñırında qanuniy avtobus naqliyatınıñ zemaneviy ağını teşkil etilüvi boyunca keñeş keçirdiler.
Keñeşte Ukraina Havfsızlıq Hızmeti Qırım MC Baş idaresiniñ, Ukraina Milliy Politsiyası Azaq-Qaradeñiz regional idaresiniñ, Ukraina Milliy Politsiyası Herson vilâyetinde Baş idaresiniñ, Ukraina naqliyat havfsızlığı Qaradeñiz regionara idaresiniñ, Geniçesk ve Qalançaq rayon devlet memuriyetiniñ, Herson vilâyeti devlet memuriyetiniñ, Ukraina Havfsızlıq Hızmeti Herson vilâyetinde İdaresiniñ, Ukraina Milliy Politsiyası Qırım MC ve Aqyar şeeri boyunca Baş idaresiniñ temsilcileri iştirak etti.
Keñeşniñ iştirakçileri Herson vilâyetiniñ Qırım ile sıñırında yerleşken rayonlarda avto vastasınen yolcu naqliyatı saasındaki menfiy vaziyetni muzakere ettiler. Bu cümleden, Qırımnıñ vaqtınca işğali devamında yarımadağa yaqın olğan rayonlarda, Qırım ile memuriy sıñırda yerleşken KÇNN-dan Ukrainanıñ nezareti altında bulunğan başqa topraqlarğa ve ters tarafqa qanunsız, nezaretsiz keñiş avto taşıma ağı öz-özünden teşkil etilgeni qayd etildi.
Ukraina Havfsızlıq Hızmetiniñ vekilleri bu sistema teşkil olunğan cinayetçilik hususiyetlerini taşığanını ve icra akimiyet ve devlet nezareti organlarnıñ faaliyetinde kütleviy qaparçılıq telükesine ketirgenini, aynı vaqıtta devam etken Rusiye istilâsı şaraitlerinde ciddiy havf ve casuslıq telükesini doğurğanını qayd ettiler.
Ukraina naqliyat havfsızlığı Qaradeñiz regionara idaresi naqliyatnen bağlı qanunlarğa riayet etilmesini kerekli derecede teşkermegeni qayd etildi. Aynı vaqıtta Qırımğa yaqın olğan rayonlarda avto naqliyatı saasında kerçekleşken cinaiy faaliyet sebebinden mütenasip nezaret tedbirler uquq qorçalav organları tarafından daa ziyade diqqat talap etmekte.
Bügünki menfiy vaziyetniñ sebeplerinden biri – rayon ve vilâyet devlet memuriyetleri kerek olğan miqdarda mütenasip avtobus marşrutları içün uzun vaqıt devamında yarış ilân etmegenleridir. Mevcüt olğan rayoniçi ve rayonara marşrutlarnıñ yolcu taşımaları KÇNN-dan keçken adamlarnıñ miqdarına teñ kelmegeni qayd etildi. Qanunlarnıñ şartlarına binaen yolcu naqliyatını keyfiyetli seviyede teşkil etmek içün vilâyet içinde bu yönelişte naqliy infrastrukturanı qurmağa kerek olğanı qayd etildi.
Ukraina Havfsızlıq Hızmetiniñ Qırım MC Baş idaresi Ukraina Prezidentiniñ casuslıqqa qarşılıq kösterüv saasında avalesi çerçivesinde vaqtınca işğal etilgen topraqlardan ve qarşı tarafqa qanunsız taşımalar doğurğan telükelerge qarşılıq köstermek içün idarelerniñ temsilcilerden ibaret olğan mahsus iş gruppasını teşkil etmege teklif etti. Bu teklifke Temsilcilik de qol tuttı.
Bundan da ğayrı, avtomobil naqliyatında hafsızlıq saasında devlet nezaretini quvetleştirmek, qanunsuz taşıyıcılar saasını daimiy nezaret altına almaq ve bütün vekâletli uquq qorçalav organlarnıñ temsilcilerni ve Ukraina naqliyat havfsızlığınıñ başqa regionlardaki hadimlerni celp etip, qanunsız taşıyıcılarnıñ faaliyetlerine qarşılıq köstermek qararlar alındı.
Keñeşniñ neticesi olaraq Herson devlet vilâyeti, davet etilgen devlet ve öz-özüni idare etüv organlarnıñ teklifleri esasında Ukrainanıñ vaqtınca işğal etilgen Qırım topraqlarınen qomşu olğan rayonlarda zemaneviy naqliy ağnıñ teşkil etilüvi boyunca leyhanı bir afta içinde azırlaycağı ve bundan soñ acele sürette mütenasip vilâyetiçi ve rayoniçi seferlerge yarış ilân etecegi aqqında añlaştılar.