Rusiye Federatsyası işğalci akimiyetiniñ vekilleri tarafından propaganda matbuat vastalarında Qırım yarımadasınıñ sakinlerinde duşmanlıq duyğularını qozğalamaq ve olarnıñ zeinlerini qarıştırmaq maqsadınen yalancı haberlerniñ darqatıluvı munasebetinen Ukraina Prezidenti Temsilciligi şunı hatırlata:

 Ukraina Qırımnı silâlı yolnen qaytarmağa niyetlenmey. Qırım Muhtar Cumhuriyeti ile Aqyar şeerini işğalden azat etüv oğrunda esasen işletilgen aletler, Rusiye Federatsiyasına siyasiy-diplomatik ve sanktsion basqınıñ yapılmasıdır.

 Rusiye Federatsiyasınıñ Ukrainağa qarşı şilâlı tecavüzi neticesinde Qırım Muhtar Cumhuriyeti ve Aqyar şeeri vaqtınca işğal etilgeni sebebinden Qırım yarımadası ile Ukraina topraqlarınıñ qıtaviy qısımı arasındaki demiryol vastasınen qatnav 2014 senesi toqtatılğan edi. Bundan ğayrı, vaqtınca işğal etilgen Qırım Muhtar Cumhuriyeti topraqlarına ve Aqyar şeerine qatnağan halqara tren seferleri de lâğu etilgen edi.

Bunıñ yerine, Qırım ile memuriy sıñırındaki KÇNN-larına yaqın rayonlar ile Ukrainanıñ qıtaviy qısımında yeleşlen strategik mesken yerler arasında demiryol vastasınen naqliyat hızmetleriniñ eyileştirilmesini maqsat etip qoyğan tedbirler yalıñız vaqtınca işğal etilgen topraqlarınıñ sakinlerini ğayrıdan integratsiya etmek ve memuriy sıñırnı keçüv şaraitlerini eyileştirmek maqsadınen amelge keçirilmektedir.

Temsilcilik ofisiniñ talabına cevap olaraq berilgen resmiy malümatlarğa dair, ”Ukrzaliznıtsâ” isse senetli şirketi vaqtınca işğal etilgen Qırım MC sıñırındaki Sivaş (”Çonğar” KÇNN) ve Vadım (”Qalançaq” KÇNN) tren duraqlarına qadar eki taraflama tren seferleriniñ yapılmasını temin etmekte.

Novooleksiyivka demiryol durağına qadar eki taraflama yolcu naqliyatı 4 çift tren vastasınen temin etile:

• 12/11 sanlı Kıyiv-Novooleksiyivka treni (er kün);
• 82/81 sanlı Harkiv-Novooleksiyivka treni (eki künde bir);
• 86/85 sanlı Lviv-Novooleksiyivka treni (eki künde bir);
• 87/88 sanlı Kovel-Novooleksiyivka treni (eki künde bir).

Novooleksiyivka-Sivaş kesiginde yolcular aşağıdaki yerli trenlerlerini qullana bile:

• № 6909/6907 Zaporijjâ-2, Melitopol-Sıvaş;
• № 6926/6925 Geniçesk-Sıvaş.

Herson durağına qadar eki taraflama yolcu naqliyatı 6 çift tren vastasınen temin etile:

• 251/252 sanlı Harkiv-Mıkolayıv treni (eki künde bir);
• 102/101 sanlı Kıyiv-Herson treni (er kün);
• 110/109 sanlı Lviv-Herson treni (eki künde bir);
• 5/6 sanlı Ujgorod-Herson treni (eki künde bir);
• 134/133 sanlı Rahiv-Mıkolayiv treni (3 künde 2 kere).

Herson-Vadım kesiginde yolcular 

• 6573/6574 ve 6577/6578 sanlı yerli trenlerlerini qullana bile.

Kelecekte yolcularnıñ ihtiyaclarını qanaatlendirmek maqsadınen qoşma trenlerniñ areket etmesi planlaştırıla.

Qoşma malümat:

”Ukrainanıñ vaqtınca işğal etilgen topraqlarında vatandaşlarnıñ aq-uquqlarını ve serbestligini qorçalav ve uquqiy tertip” mevzusında 2014 senesi çiçek ayınıñ 15-de qabul etilgen Ukraina qanunı 4-nci maddesiniñ 1-nci qısımına binaen, vaqtınca işğal etilgen topraqlar ile sıñırlarnı keçüvge dair mahsus uquqiy tertip üküm sürmekte. Aynı Ukraina qanunınıñ 10-ncı maddesine binaen, şahsiyetlerini ve Ukraina vatandaşlıqlarını tasdıqlağan vesiqalarnı köstergen Ukraina vatandaşları KÇNN keçip, vaqtınca işğal etilgen topraqlarğa serbest ve maniasız kiriş ve çıqış aqqına saipler. Çetel vatandaşları ve vatandaşlıqları olmağan şahıslar mahsus ruhset alğan soñ KÇNN keçip, vaqtınca işğal etilgen topraqlarğa kiriş ve çıqış yapa bileler.

Vaqtınca işğal etilgen topraqlarğa kiriş ve çıqış tertibi Ukraina Nazirler Şurası tarafından 2015 senesi ilk yaz ayınıñ 4-de qabul etilgen ”Vaqtınca işğal etilgen topraqlarğa kiriş ve çıqış tertibi aqqında” 367 sanlı qararğa esaslana.