2018 senesi yanvar 25 künü Ukraina Prezidentiniñ Qırım MC Temsilciliginde uquqiy talil hızmetiniñ baş konsultantı vazifesini becergen Ruslan Seydametov Vaqtınca işğal etilgen topraqlarlarnıñ ve memleket içinde mecburen köçken şahıslarnıñ meseleleri boyunca nazirlik tarafından teşkil etilgen ”Vaqtınca işğal olunğan topraqlarda ölüm ve doğuv adiseleriniñ qayd etilüvi saasında diskriminatsiyanen küreş yolları” serlevalı tögerek masada iştirak etti.

Tögerek masa devamında vaqtınca işğal olunğan topraqlarda ölüm ve doğuv adiseleri işğalci akimiyet  bergen sözde ”vesiqalar” esasında tasdıqlanıp, doğum ya da ölüm aqqında ukrain şeadetnamelerniñ resmiyleştirüvi içün memuriy (mahkemeden tış) protsedurasınıñ işke qoyulması boyunca «”SİM” Uquqiy ve siyasiy araştırmalar merkezi» cemaat teşkilâtınıñ teklifi muzakere etildi.

Teklifke Vaqtınca işğal etilgen topraqlarlarnıñ ve memleket içinde mecburen köçken şahıslarnıñ meseleleri boyunca nazirlik umumen olaraq qol tuttı.

İşğalci akimiyet bergen sözde ”olüm ve doğuv şeadetnameleriniñ” ukrain akimiyet organları tarafından qabul etilmesine Temsilcilik kesen-kes qarşı çıqa, çünki böyle vaziyet ‘‘Vaqtınca işğal etilgen topraqlarında uquqiy nizam ve vatandaşlarnıñ aq-uquqlarına riayet etilmesi” Ukraina qanunınıñ 9 sanlı maddesini boza ve Qırım yarımadasında Rusiye ükümranlığınıñ qabul etilmesine doğrudan-doğru ketire bile.

Qanunsız akimiyet organlarından alınğan sözde ”olüm ve doğuv aqqında şeadetnameleri”, öz uquqiy tabiatı boyunca faydasız kâğıtlardır. Halqara mahkeme tecribesini, yani ”Namibiya istisnaları” olaraq belli olğan BMT Halqara mahkemesiniñ qararını diqqatqa alsacaq olsaq, olar resmiy vesiqa degil ve yalıñız doğuv ya da olüm adiseleriniñ tasdığı olaraq qabul etile bile. Böyle ‘‘vesiqalarnı” nasıldır qullanmağa mümkün degil, bu ameldeki qanuniyetni boza ve işğalden azat etüv ceryanlarına menfiy sürette tesir ete.

Temsilcilikniñ nazar noqtasına Adliye nazirliginiñ temsilcileri de qol tuttı.