Martnıñ 26-nda Temsilcilikte “TAŞQIRĞAN. Qırımda qadınlarnıñ qarşılığı” sergisinde ekskursiya keçti. Ekskursiyanı serginiñ reberi, Ukraina institutınıñ icadiy müdiri Tetâna Filevska ötkerdi. Tedbirde sergide işleri taqdim etilgen sanatçı Emine Ziyatdinova da iştirak etti.

Emine hanım qorantasınıñ ve fotosergide kösterilgen insanlarnıñ ikâyelerini añlattı. Sanatçı işğalcilerniñ kelgeninden soñ yarımadada olğan deñişmeler, insanlarnıñ cenazeni keçirmek içün işğalci memuriyetlerge muracaat etmek kerek olğanlarını, hastalarnıñ işğalciler tarafından kirsetilgen sıñırlavlar sebebinden ilâç alamayıp ölgenleri aqqında aytıp berdi.

“2014 senesi bu kün qanunsız “referendumnıñ” neticeleri ilân etilgenini hatırlayım. Tañdan gece saat 12-ge qadar çalıştım. Ve bir ande tarihniñ kene tekrarlanğanını añlap ağlamağa başladım. Endi er kes sürgünlikten qaytıp, yaşayışını qurdı. Belki de, daa o qadar mükemmel degil edi, amma er şeyniñ doğru yönelişte areket etmesi is etile edi. 2014-te ise vaqıt ve areket sanki turdı. Sen de o büyük qorqu maşnasınıñ qarşısında qaldıñ”,

dep paylaştı Emine

Ondan da ğayrı, fotoressam tintüvler, qanunsız tutuluvlar, olardan sebep ise rus işğalcileriniñ apishanelerinde pek yaramay şaraitte çoq yıllıq mahküm etilüvlerge oğrağan siyasiy mabüsler aqqında da hatırlattı.

“İnsanlarğa sözde terrorizm ve ekstremizm aqqında insanlarğa qarşı “davalar” uydurılğanda Ukraina ve çetelde siyasiy mabüslerniñ ikâyelerini aydınlatmağa pek qıyın. Misal olaraq, Nariman Celâl: bir kün sen Qırım Platformasında iştirak etesiñ, kelecek kün ise – seni sözde “gaz borusını patlatmada” qabaatlaylar ve qanunsız şekilde tevqif etip, 17 yılğa apiske oturtalar”, – dep qoştı sanatçı.

Bundan da ğayrı, sergi vaqtında ziyaretçiler Mariya Kulikovska, Alevtina Kahidze, Yuliya Po, Liya Dostleva kibi zemaneviy ukrain sanatçılarınıñ eserleri ve çalışmalarınen tanış oldı. Sergide ayrıca, “Zla Mavka” qarşılıq areketi faalleriniñ kündelikleri taqdim etildi, Lesâ Ukrayinka şahısı ve eserlerinen bağlı tarihiy kontekst añlatıldı.

Ekskursiyağa qoşulğan ve Qırımda qadın qarşılığı mevzusına diqqat ayırğan ziyaretçilerge minnetdarlığımıznı bildiremiz. Sergi aqqında tafsilâtlı malümat: https://lomykamin.crimea-platform.org/

Kelecek ekskursiyalar aqqında anonslarnı körmek içün Temsilciligimizniñ saifelerini taqip etiñiz!