Bugün, 2025 senesi yanvarniñ 17-nde, Temsilcillik teşebbüsinen Bütünkraina gençler merkezinde Ukraina Prezidentiniñ Qırım Muhtar Cumhuriyetindeki Temsilciligi yanındaki Ekspert şurasınıñ toplaşuvı olıp keçti. Temsilcilik tarafından toplaşuvda Daimiy Temsiliciniñ muavini Denıs Çıstikov ile Temsilicilikniñ vatandaşlarnıñ muracaatları ve vesiqalı teminlev bölüginiñ müdiri Yevğen Samuha iştirak ettiler.
Halqara işbirlik yönelişinde Temsilcilik Berlinde keçken “Ukraine Recovery Conference” tedbirinde iştirak etti, aynı zamanda Ukrainanıñ halqara platformalardaki bulunuvı üzerinde birçoq çalışmalar yürsetildi. Bunıñnen beraber, Temsilcilik sanktsiyalar siyaseti saasında da çalışacaq.
Daimiy Temsilciniñ muavini bütün menfaatlı taraflarnen işbirlikniñ müimligini qayd etip, iştirakçilerni halqara tedbirler içün materiallar tekliflerini, qardaş şeerlernen añlaşmalar imzalama teşebbüslerini ve işğal etilgen topraqlardan kelgen vatandaşlarğa destek mevzusında fikirlerini bildirmege çağırdı.
“Qırımnıñ ğayrıdan integratsiyası içün elimizden kelgenini yapmaq umumiy maqsadımızdır. Eger siziñ bu meselede yardım ete bilecek teşebbüsiñiz, ğayeñiz ya da malümatıñız olsa, biz işbirlikke ve yardımlaşuvğa açıqmız”, — dep, qayd etti Denıs Çıstikov.
2025 senesi Temsilcilik esas teşebbüslerge diqqat ayırıp, bir qaç saada faaliyetini keñişletmege planlaştıra. Hususan, Temsiliclik Qırımnıñ işğalge tirenüv kününe bağışlanğan tedbirlerge azırlıqlarnı başladı. Halqara işbirlik saasında Qırım platforması sammitlerine ve “Crimea Global” üçünci halqara konferentsiyasına azırlıqqa, em de Qırım mevzusını ileriletüv içün halqara tedbirlerde faal iştirak etüvge emiyet berilecek. Aynı vaqıtta vaqtınca işğal etilgen topraqlardan kelgen vatandaşlarğa, hususan balalarğa ve yaşlarğa yardım etüv, olarnıñ qaytmaları içün çalışmalar yürsetüv, vesiqalarını alabilmeleri, uquqiy yardım körebilmeleri ve Ukrainada tasil alabilmeleri meselelerine ayrı diqqat ayırılacaq.
Ekspert şuranıñ azalarına toplaşuvda iştirak etkenleri içün teşekkürlerimizni bildiremiz.