Mayısnıñ 18-nde Qırımtatar halqı genotsidi qurbanlarınıñ hatıra Memorialı yanında 1944 senesi sovet akimiyeti tarafından tuvğan toprağından sürgün etilgen yüzlernen qırımtatarlarnıñ hatıralarına bağışlanğan tedbir keçirildi. Memorial 2024 senesi Qırım platformasınıñ Dördünci sammiti vaqtında açtılar.
Tedbir, Ukrayina Prezidenti Volodımır Zelenskıy ve apayı Olena Zelenskayanıñ qurbanlarnı añmaq içün memorialğa çıraq qoymasından başlandı.
Merasimge Prezident ofisiniñ yolbaşçısı, general-leytenant Kırılo Budanov, Prezident ofisi yolbaşçısınıñ birinci muavini Sergiy Kıslıtsa, Prezident ofisi yolbaşçısınıñ muavini Olena Kovalska ve İgor Jovkva, Daimiy Temsilci Olga Kurışko, qırımtatar halqınıñ lideri, Ukrayina halq deputatı Mustafa Cemilev, Milliy Meclis reisi Refat Çubarov ve diger meclis azaları, halq deputatı Tamila Taşeva, Devlet etnosiyaset ve serbestlik hızmeti yolbaşçısı Viktor Yelenskıy qoşuldı.
Tedbir qırımtatar halqınıñ temsilcileri, arbiy hızmetçiler, quvet qurulışlarınıñ vekilleri, cemaat teşkilâtçıları, Ukrayinadaki çetel diplomatik missiyalarınıñ vekilleri ve diger devlet erbaplarını birleştirdi, olar sürgünlik qurbanlarınıñ hatırasını añma maqsadınen bir arağa keldiler.
Tedbir vaqtında Ukrayina Prezidenti Volodımır Zelenskıy çıqışta bulundı. O, Ukrayinanıñ qırımtatar halqınıñ genotsidi qurbanlarınıñ hatırasını saqlağanını ve Qırım işğali sebebinden rusiye Ukrayinağa qarşı tecavuz başlağanını qayd etti.
Hatıra merasimi qırımtatar halqınıñ lideri, Ukrayina halq deputatı Mustafa Cemilevniñ çıqışınen deam etti. O, sürgünlikten soñ qırımtatarlar on yıllar devamında uquqsızlıq ve zulum şaraitlerinde yaşağanlarını, bu cinayetler aqqında da yıllardır dünyada kimse bilmegenini hatırlattı.
Tedbir Qırım Muhtar Cumhuriyeti Diniy idaresiniñ müftisi, şeyh Ayder Rustamıvnıñ duasınen yekünlendi.
Tedbir vaqtında iştirakçiler “Serbest Qırımğa mektüp” adlı aktsiyağa qoşulıp, işğalci devlet tarafından qanunsız tutılğan siyasiy mabüslerge mektüpler yazıp oldılar. Bu teşebbüs 2023 senesi ”PEN Ukrayina” cemaat teşkilatı, ”KrımSOS” teşkilâtı ve ZMINA insan aqları Merkezi tarafından başlatıldı. Bundan da ğayrı, 1944 senesi qırımtatar halqınıñ sürgünligi vaqialarını daa teren añlatqan tarihiy malümatnen tanış olmağa imkânları oldı.
Tedbir Büyük Britaniya, Kanada, Felemenk, Amerika Birleşken Devletleri, Finlandiya, İsviçre ve İsveçiya ükümetleri tarafından maliy destek alğan “Küçlü Ukrayina içün ortaqlıq” Fondu desteginen Ukrayina Prezidentiniñ Qırım Muhtar Cumhuriyetindeki Daimiy Temsilciligi/Qırım Platforması ofisi ve Qırımtatar Milliy Meclisi tarafından teşkil etildi.