Kün: 4 iyün

Saat: 10:00

Yer: Mediatsentr Ukraina, Kıyiv

Er yıl iyünniñ 4-nde Halqara suçsuz balalar künü qayd etile. Bu hatıra künü 1982 senesi BMT Baş Assambleyasınıñ qararı ile tesis etildi. Bu tedbirniñ maqsadı bütün dünyada balalarğa qarşı yapılğan tecavuz ve zorbalıq meselelerine diqqat celp etmek. Masüm balalar, fizikiy, ruhiy ya da cınsiy zorbalıqtan farqlı tecavuz şekilleriniñ qurbanları olalar. Bugün bizler, 11 yıldan ziyade devam etken rusiye silâlı tecavuzınıñ qurbanı olğan cenk, işğal ve repressiyalarnıñ qurbanı olğan ukrain balaları aqqında söz yürsetemiz.

Brifingniñ maqsadı: cemiyetniñ, kütleviy haber vastalarınıñ ve halqara toplulıqnıñ diqqatını cenk, işğalcilik, arbiyleştirüv ve Rusiye işğalci repressiv maşinasınıñ repressiyaları altında bulunğan ukrain balalarınıñ vaziyetine celp etmek. Bala aqlarınıñ bozuluvınıñ konkret misallerini köstermek, zarar körgen ana-babalarnıñ ikâyelerini ikâye etmek, em de Ukraina kelecek nesli içün Rusiye istilâsınıñ uzun müddetli aqibetlerini aydınlatmaq.

Muzakere etilecek mevzular: 

• İşğal şaraitinde balalar: vaqtınca işğal etilgen Donetsk, Lugansk, Herson, Zaporijja vilâyetleri ve Qırım topraqlarından balalarnıñ vaziyeti; areket serbestliginiñ sıñırlanması, yahşı tasil almaq imkânınıñ olmaması, gumanitar buhran; balalarnıñ qaçırılması, mecburiy pasportlaştıruv, psihologik basqı, sürgünlik;
• Siyasiy mabüsler ve repressiyalarğa oğrağan qorantalarnıñ balaları: ana-babalarınıñ apiske alınmasınıñ duyğusal ve içtimaiy aqibetleri, qırımtatar qorantalarınıñ ikayeleri; vatandaş cemiyetiniñ böyle qorantalarğa qol tutuvdaki rolü;
• Qırımda askeriyleştirüv ve indoktrinatsiya: tasil programmalarınıñ rus propagandasına köre deñiştirilüvi; “Yunarmiya” teşkilâtlarınıñ işlevi ve tasil esnasınıñ askeriyleştirilüvi; mekteplerde rus arbiy propagandası, ukrain ve qırımtatar balalarınıñ milliy kimligini yoq etüv, “duşman” obrazını kirsetüv; balalarnıñ añlarınıñ askeriyleştirilüvi aqibetleri.

Davet etilgen qonuşmacılar:

• Olga Kurışko, Ukraina Prezidentiniñ Qırım Muhtar Cumhuriyetinde Daimiy Temsilcisi;
• Oleksandra Dvoretska, uquq qoruyıcı, Bring Kids Back UA teşebbüsiniñ siyaset meseleleri boyunca reberi;
• Valentina Potapova, “Almeda” cemaat maarifi merkeziniñ yolbaşçısı;
• Leviza Celâl, cemaat faali, sabıq siyasiy mabüs Nariman Celâlnıñ apayı;
• Alevtina Kahidze, ukrain ressamı, performansçı, media ressamı;
• Rudenko Vladislav, Rus işğaline qarşı çıqtı ve rus arbiyleri tarafından vaqtınca işğal etilgen Herson şeerinden zornen çıqarıldı.

Tedbir Bring Kids Back UA teşebbüsiniñ destegi ile Ukraina Prezidentiniñ Qırım Muhtar Cumhuriyetindeki Temsilciligi ve Ukraina Media Merkezi tarafından teşkil etilmekte.