İnanılmaz quvançlı haber – Vladıslav Yesıpenko azat etildi!

İşğal etilgen Qırımda 2021 senesinden berli qanunsız şekilde apiste tutulğan Azatlıq Radiosınıñ “Qırım.Aqiqat” leyhasınıñ jurnalisti Vladıslav Yesıpenko niayet azat etildi.

2022 senesi işğalci mahkeme Vladıslavnı sahte qabaatlavlar sebebinden beş yılğa qadar apis cezasına ve 110 biñ ruble cçremege mahküm etken edi. Ukraina vatandaşınıñ kerçek tutulma sebebi – onıñ mustaqil jurnalistik faaliyeti, hususan, Qırımda işğalciler tarafından insan aqları bozuluvlarını aydınlatılmasıdır, bu ise, elbette ki, matbuat vastalarında sert tsenzuranı talap etken rusiyege uyğun kelmedi.

Söz serbestligine sadıqlığı içün Vladıslav Yesıpenko Levko Lukyanenko adına devlet stipendiyası (2021) ve PEN Amerika Barbey Freedom to Write Award (2022) mukâfatlarını aldı .

Yesıpenko iyünniñ 20-nde azat etildi, amma telükesizlik tedbirleri sebebinden Vladıslavnıñ işğal etilgen Qırımdan çıqışına qadar haber etilmey edi. Şimdi jurnalist Avropa Birligi memleketlerinden birinde teşkerüv ve tedaviylevden keçecek. Qanunsız şekilde apishanede bulunğan vaqtında o, bir qaç kere fizikiy ve ruhiy işkencelerge oğratıldı.

Vladıslav Yesıpenknıñ qorantasına destek bildiremiz ve bugün körüşmege imkânları olğanına quvanamız. Yıllarnen devam etken küreşten soñ, bu qorantanıñ rusiye sebebinden çekken acısını körmemezlikten kelemeymiz.

Foto: Azatlıq Radiosı