2018 senesi fevral 8 künü Ukraina Prezidentiniñ Qırım Muhtar Cumhuriyetindeki Temsilciliginiñ vekilleri Aqşeyh rayonınıñ Serebryanka (Munus) köyünde yaşap, vatanperver baqışları içün Rusiyeniñ cezalav sisteması tarafından taqip etilgen ve onınen küreşken qırım fermacı Volodımır Baluhnıñ doğğan künü münasebeti ile ‘’Qırım evinde’’ keçirilgen birdemlik aqşamında iştirak ettiler.
Merasimde Qırımtatar halqı Milliy Meclisniñ reis muavinleri ve azaları, cemaat teşkilatlarınıñ vekilleri, faalciler, dostları, siyasiy mabüslerniñ qoranta azaları ve Volodımır Baluh ile birdemliklerini beyan etip, oña qoltutmağa istegen başqa lâqayd olmağan isanlar, bu cümleden, sabıq siyasiy mabüsler İlmi Ümerov, Ahtem Çiygoz ve Tatarstan Cumhuriyetinden Rafis Kaşapov. Merasim devamında Volodımır Baluhnıñ qorantasınen ve imayecisi Olğa Dinze ile Skayp vastasınen bağlandılar. Aqşamnıñ iştirakçileri Volodımır Baluhnıñ maküm etilmesiniñ sebebini, onıñ faal vatandaşlıq mevamını hatırlap, Qırımda şimdiki vaziyetni, yañı tüntüvlerni, yaqalavlarnı ve cinaiy işlerni muzakere ettiler.
Malüm olğanı kibi, 2014 senesi Volodımır Baluh, Qırımda Rusiyeniñ işğalci ükümranlığını qabul etmeyip, eviniñ damında Ukraina bayrağını astı. 2016 senesiniñ soñunda o, 2014 senesi fevral ayında Kıyivniñ Mustaqillik Meydanında elâk olğan vatandaşlarnıñ hatırasına eviniñ duvarında ‘’Kök yüzlügi qaramanlarınıñ soqağı’’ levhasını yerleştirdi. 2018 senesi yanvar 16 künü işğalci akimiyetke boysunğan ‘’makemeci’’ Olena Tedeyeva qanunsız olaraq Volodımır Baluhnı 3 yıl ve 7 ay apis müddetine maküm etti, bundan ğayrı oña 10 biñ ruble miqdarında para cezasını kestiler. Al-azırda, ‘’tüzetüv müessiseleriniñ işlerini bozğanı içün’’, işğalci akimiyetniñ cezalav organları oña qarşı daa bir cinaiy işni açtılar. Şimdi işğalciler tarafından qanunsız alda maküm etilgen Volodımır Baluh Aqmescitniñ SİZO-sında buluna.
Temsilcilik vekâleti çerçivesinde siyasiy mabüslerge ve olarnıñ qorantalarına er türlü yardım köstermek, olarnıñ gumanitar meselelerini çezmek, aq-uquqlarına riayet etmek, qıta Ukrainada olarğa memuriy hızmetlerni bermek içün qolundan kelgenini yapacaq.