2018 senesi arman ayı (august) 28 künü Kyıv şeerinde keçirilgen Ukraina çetel diplomatik müessiselerniñ nevbetteki yıllıq keñeşinde Ukraina Prezidenti Petro Poroşenko rusiye istilâsına qarşılıq kösterüv ve Qırımnıñ işğalden azat etilüvini azırlav kibi saalarda Ukrainanıñ tışqı siyasiy faaliyetine yüksek qıymet kesti. ‘‘Bazı şahıslar, qol tutuv almaq içün Qırım aqqında unutmağa, Donbassta işe keri çekilmeğe tavsiye etken ediler. Belki de Avropağa alıp ketken yoldan başqa tarafqa aylânmağa da kerek olur edi. Nasıl maqsatnen? İstilâcını açuvlandırmamaq içün emiş’’, – dep qayd etti Petro Poroşenko. ‘‘Bizim Avropa-atlantik yönelişimizden vazgeçmek ve deral Moskovanıñ ahırına qaytmaq – qaytsaq, er şey yahşı olur emiş. Bizge ne içün böyle tevsiyeler berile edi? Çünki Kıyivniñ Moskova ile davalaşmağa ne küçü, ne de aqqı bar emiş. Çünki yüzlerce yıllar devamında, ve tarih buña şaatlıq etmekte, Kıyiv mustaqil siyaset alıp barmağa aqqından marum edi’’, – qoşıp ayttı Ukraina Prezidenti. Prezident qayd etkenine köre, ‘‘yüzlerce körüşüvleriniñ ve daa ziyade telefon sübetleriniñ bütün inceliklerini bilgen adamlar pek az’’. ‘‘Bunıñ neticesi ise halqara seviyede bügünki küçlü qol tutuvdır. Deyler ki, kerçerniñ toqtatılmaz suvları yalannıñ ve aynecilikniñ sözde küçlü bütün duvarlarını yıqar’’, – dep qoştı Petro Poroşenko ve Qırım ile Donbasnıñ qısımını biz siyasiy-diplomatik yolnen qaytarmağa tırışqanımıznı hatırlattı. Prezident qayd etkenine köre, rusiye apishanelerinde ale daa tutulğan siyasiy mabuslarnıñ, işğal etilgen topraqtaki reinelerniñ, bu cümleden Qırımdaki siyasiy mabuslarnıñ taqdiri ‘‘rusiye barışıqı’’ ile bizim maqsadımız olğan Avropa arasında teren bir uçurum olğanını acı ile hatırlatmaqtadır.

Keñeşte çıqışta bulunur eken, Ukraina Prezidenti Azaq deñizi suvlarında bizim menfaatlarımıznı qorçalavı boyunca Ukraina çetel işler Nazirliginden tekliflerni beklegenini qayd etti. ‘‘Buña iç te razı olmam. Ve qatiyen eminim ki – şimdiki vaziyetni qabul etmege kesen-kes mümkün degil. Bu munasebet ile Ukraina Milliy havfsızlıq ve mudafaa Şurasınıñ mütenasip oturışını azırlamağa avale ettim’’,- dep qayd etti Petro Poroşenko.